ویب ڈیسک: لوکل ٹرانسپورٹ کی مشکلات اور دیگر مسائل کا شکار عوام کیلئے بڑی خوشخبری، صوبائی حکومت کی جانب سے بی آرٹی سروس رنگ روڈ، باڑہ اور خیبر روڈ پر چلانےکا فیصلہ کیا گیاہے۔
وزیر اعلیٰ خیبر پختونخوا علی امین خان گنڈاپور کی زیر صدارت اس حوالے سے اجلاس منعقد ہوا، جس میں پشاور کے باسیوں کے لئے ایک اور بڑی خوشخبری سناتے ہوئے بی آر ٹی سروس کو دیگر علاقوں تک توسیع دینے کا فیصلہ کیا گیا ہے۔
صوبائی حکومت کی جانب سے بی آرٹی سروس رنگ روڈ، باڑہ اور خیبر روڈ پر چلانے کا فیصلہ کیا گیا ہے، جس سے عوام کو بہت سہولت رہے گی۔ اجلاس میں بی آر ٹی بسوں کی کمی کو پورا کرنے کے لئے مزید بسیں خریدنے کا بھی فیصلہ ہوا ہے۔
اجلاس میں فیصلہ کیا گیا کہ بی آر ٹی بسوں میں مسافروں کے رش کو کم کرنے کے لئے مزید 72 ڈیزل ہائیبرڈ بسیں خریدی جائیں گی، نئی بسوں کی خریداری اور نئے روٹس پر بسیں چلانے کے سلسلے میں سول ورکس مکمل کرنے کے لئے چھ مہینوں کی ڈیڈلائن مقرر کی گئی ہے۔
وزیراعلیٰ کی زیرصدارت ہونے والے اس اجلاس میں بی آر ٹی کے زیر تعمیر پلازوں پر پیشرفت کا بھی جائزہ لیا گیا، اجلاس میں اس حوالے سے بریفنگ دیتے ہوئے بتایا گیا کہ مال آف حیات آباد اور ڈبگری میں زیر تعمیر پلازے اس سال اپریل کے آخر تک تیار ہو جائیں گے۔
اجلاس میں صوبائی دارالحکومت پشاور میں ٹریفک کے مسائل کو حل کرنے کے لئے بھی اہم فیصلے کئے گئے، اس حوالے سے بتایا گیا کہ پہلی ترجیح میں رنگ روڈ کے مسنگ لنک کی تعمیر پر کام شروع کیا جائے گا، اس منصوبے کی جلد از جلد تکمیل کے لئے فل فنڈنگ کا انتظام کیا جائے گا۔
اجلاس میں فیصلہ ہوا کہ ٹریفک روانی کے لئے شہر کے مختلف مقامات پر انڈر پاسز تعمیر کئے جائیں گے، رنگ روڈ اور یونیورسٹی روڈ کے مختلف مقامات پر سات انڈر پاسز تعمیر کئے جائیں گے، اس حوالے سے متعلقہ حکام کو دو مہینوں میں ان انڈر پاسز کی فیزیبلٹی مکمل کرنے کی ہدایت کی گئی ہے۔
اجلاس میں اندرون شہر کے گنجان آباد علاقوں میں بھی انڈر پاسز تعمیر کرنے کے لئے منصوبہ شروع کرنے کا فیصلہ کیا گیا ہے، یونیورسٹی روڈ کے مختلف مقامات پر ٹریفک کی روانی میں خلل ڈالنے والی تمام رکاوٹوں کو ایک مہینے میں ختم کرنے اور اگلے سالانہ ترقیاتی پروگرام میں انڈسٹریل سٹیٹ کو ناردرن بائی پاس سے براہ راست لنک کرنے کے لئے سڑک تعمیر کرنے کا فیصلہ کیا گیا۔
وزیراعلیٰ خیبرپختونخوا سردار علی امین گنڈاپور نے کہا کہ پشاور ہم سب کا شہر اور صوبے کا چہرہ ہے، اس کی تعمیر و ترقی ہماری اہم ترجیح ہے، پشاور کو صحیح معنوں میں صوبے کا ایک خوبصورت چہرہ بنایا جائے گا، اس شہر کی ترقی اور یہاں جدید شہری سہولیات کی فراہمی کے لئے پرعزم ہیں۔
انہوں نے کہا کہ پشاور شہر کی خوبصورتی کیلئے مالی وسائل کی کمی کو رکاوٹ نہیں بننے دیا جائے گا، بی آر ٹی نہ صرف ٹرانسپورٹ کا ایک معیاری منصوبہ ہے بلکہ اس سے فضائی آلودگی کو کم کرنے میں خاطر خواہ مدد مل رہی ہے، عوامی سہولت اور ضرورت کے پیش نظر بی آر ٹی سروس کو مزید بہتر بنایا جائے گا۔
اجلاس میں صوبے کے ڈویژنل ہیڈکوارٹرز میں بھی بی آر ٹی طرز کی بسیں چلانے کا اصولی فیصلہ کیا گیا، اس مقصد کے لیے ابتدائی طور پر صوبے کے چار ڈویژنل ہیڈکوارٹرز کی فیزیبلٹی سٹڈی کی جائے گی، ان ڈویژنل ہیڈکوارٹرز میں مردان، سوات، ایبٹ آباد اور ڈی آئی خان شامل ہیں۔
وزیراعلیٰ کی زیر صدارت اجلاس میں فیصلہ کیا گیا کہ ان چاروں شہروں کی فیزیبلٹی اسٹڈیز ایک مہینے میں مکمل کی جائیں گی، جس کی روشنی میں ان شہروں میں ماحول دوست بسیں چلانے کے لئے مزید اقدامات کئے جائیں گے۔
سردار علی امین گنڈاپور نے کہا کہ ڈویژنل ہیڈکوارٹرز میں ٹریفک کے مسائل کو حل کرنے اور لوگوں کو ٹرانسپورٹ کی معیاری سہولت کی فراہمی کے لئے ماحول دوست بسیں چلانے کی ضرورت ہے، بڑھتی آبادی کی وجہ سے ٹریفک اور فضائی آلودگی کے مسائل بھی بڑھ رہے ہیں، ان مسائل سے مؤثر انداز میں نمٹنے اور لوگوں کو جدید سفری سہولیات کے لئے اس طرح کے اقدامات کی اشد ضرورت ہے۔
