ویب ڈیسک: عمران بشریٰ ملاقات نہ کرانے پر سپرنٹنڈنٹ اڈیالہ جیل عدالت طلب کر لئے گئے۔ تفصیلات کے مطابق بانی پی ٹی آئی اور سابق وزیراعظم عمران خان سے ان کی اہلیہ بشریٰ بی بی کی ملاقات نہ کرانے پر سپرنٹنڈنٹ اڈیالہ جیل کو عدالت طلب کرلیا گیا ہے، عدالتی احکامات کے باوحود بانی پی ٹی آئی کی سابق خاتون اول سے ملاقات نہ کرانے پر توہین عدالت درخواست پر اسلام آباد ہائی کورٹ میں سماعت ہوئی۔
سماعت کے دوران عدالت نے 27 فروری کو سپرنٹنڈنٹ اڈیالہ جیل کو ذاتی حیثیت میں طلب کر لیا، جیل سپرنٹنڈنٹ کے خلاف توہین عدالت کی درخواست پر قائم مقام چیف جسٹس سرفراز ڈوگر نے سماعت کی، اس دوران بانی پی ٹی آئی کی جانب سے فیصل چوہدری پیش ہوئے۔
وکیل نے عدالت کو بتایا کہ بانی پی ٹی آئی سے ملاقات کے حوالے سے اس عدالت کے حکم پر ابھی تک عمل نہیں ہوا، 28 جنوری کو جیل سپرنٹنڈنٹ نے عدالت میں بانی پی ٹی آئی کی بشریٰ بی بی سے ملاقات کا بیان دیا تھا، اس کے باوجود ملاقات نہیں کرائی جا رہی۔
عدالت نے سٹیٹ کونسل سے استفسار کیا کہ کیوں اس عدالت کے حکم پر عمل نہیں ہوا؟ لاء افسر اس آرڈر پر عمل درآمد یقینی بنائیں، بعد ازاں عدالت نے سپرنٹنڈنٹ اڈیالہ جیل کو طلب کرتے ہوئے سماعت 27 فروری تک ملتوی کردی۔
