ویب ڈیسک: چوتھے توسیعی منصوبے کا جائزہ لینے ایگزیکٹو ڈائریکٹرز ورلڈبنک کا وفد تربیلا ڈیم پہنچ گیا، تربیلا چوتھے توسیعی منصوبے سے نیشنل گرڈ کو 27 کروڑ 53 لاکھ 10 ہزار یونٹ بجلی مہیا ہو چکی ہے۔
وفد نے تربیلا ڈیم، تربیلا چوتھے توسیعی منصوبے اور زیرتعمیر تربیلا پانچویں توسیعی منصوبے کا تفصیلی دورہ کیا، اس دوران چیئرمین واپڈا بھی موجود تھے۔ اس دوران بتایا گیا کہ تربیلا ڈیم، تربیلا ہائیڈل پاور سٹیشن اور چوتھا توسیعی منصوبہ ورلڈ بنک کی مالی معاونت سے مکمل کئے گئے۔
ذرائع کے مطابق ہری پور۔ورلڈ بنک زیرتعمیر تربیلا پانچویں توسیعی منصوبے کے لئے بھی 390 ملین امریکی ڈالر فراہم کر رہا ہے۔
چیئرمین واپڈا کا کہنا تھا کہ ورلڈ بنک اور واپڈا گزشتہ 6 دہائیوں سے ترقی میں شراکت دار ہیں، امید ہے ورلڈ بنک پاکستان کی ترقی کے لئے آبی وسائل کی تعمیر کے ذریعے واپڈا کی معاونت جاری رکھے گا۔
ورلڈ بینک کے وفد نے تربیلا ڈیم سمیت دیگر پن بجلی منصوبوں کی تعمیر میں واپڈا کے کردار کی تعریف کی، اس موقع پر وفد کو بریفنگ دیتے ہوئے بتایا گیا کہ تربیلا ڈیم 1974 میں اپنی تعمیر سے اب تک پاکستان کی معاشی اور معاشرتی ترقی میں کلیدی کردار ادا کر رہا ہے، تربیلا ڈیم اپنی تکمیل کے بعد زراعت کے لئے 411 ملین ایکڑ فٹ پانی مہیا کر چکا ہے۔
بریفنگ کے دوران بتایا گیا کہ تربیلا ہائیڈل پاور سٹیشن سے نیشنل گرڈ کو مجموعی طور پر 597 ارب 30 کروڑ 90 لاکھ یونٹ سستی بجلی فراہم کی جا چکی ہے، تربیلا ڈیم قومی اقتصادیات کو 411 ارب امریکی ڈالر کے مساوی فوائد پہنچا چکا ہے، جبکہ تربیلا ڈیم چوتھا توسیعی منصوبہ ورلڈ بنک کا فلیگ شپ پراجیکٹ ہے۔
ورلڈ بینک کے وفد کو دی جانیوالی بریفنگ میں یہ بھِی بتایا گیا کہ تربیلا چوتھے توسیعی منصوبے سے نیشنل گرڈ کو 27 کروڑ 53 لاکھ 10 ہزار یونٹ بجلی مہیا ہو چکی ہے، تربیلا پانچویں توسیعی منصوبے کی تمام اہم سائٹس پر تعمیراتی کام جاری ہے، جبکہ پانچویں توسیعی منصوبے سے بجلی کی پیداوار 2026 میں شروع ہوگی۔ یاد رہے چوتھے توسیعی منصوبے کا جائزہ لینے ایگزیکٹو ڈائریکٹرز ورلڈبنک کا وفد تربیلا ڈیم پہنچ گیا۔
