ویب ڈیسک: پشاور ہائیکورٹ نے ججزاور عدلیہ کی سیکورٹی سے متعلق درخواست پر سماعت کے دوران سکیورٹی اجلاس کی رپورٹ طلب کرلی۔
ججز اور عدلیہ کی سکیورٹی سے متعلق دائر درخواست پر پشاور ہائیکورٹ کے قائم مقام چیف جسٹس ایس ایم عتیق شاہ اور جسٹس وقار احمد نے سماعت کی۔
درخواست گزار کے وکیل نے موقف اختیار کیا کہ صوبے کے جنوبی اضلاع میں امن و امان کی صورتحال خراب ہے، رجسٹرار پشاور ہائی کورٹ کی زیرصدارت عدلیہ کی سیکیورٹی سے متعلق 2 اجلاس ہوئے تاہم رپورٹ تاحال جمع نہیں ہوئی۔
رجسٹرار پشاور ہائیکورٹ بیرسٹر اختیار عدالت میں پیش ہوئے، قائم مقام چیف جسٹس نے استفسار کیا کہ کمیٹی اجلاس میں کچھ فائنڈنگ آئی ہے عدالتوں کے احاطے کے لیے سیکورٹی کے کیا انتظامات ہیں۔
رجسٹرار نے جواب دیا کہ ججز سیکورٹی کے حوالے سے 30 دسمبر کا نوٹیفکیشن موجود ہے، پہلے ایڈیشنل سیشن ججز، سول ججز کے لئے سکیورٹی نہیں تھی اب دی گئی ہے ،جنوبی اضلاع میں ججز اور بارایسوسی ایشن کے لئے سکیورٹی فراہم کی گئی ہے۔
رجسٹرار پشاور ہائی کورٹ نے عدالت سے استدعا کی کہ 24فروری کو کرم کی عدالتوں اور ججز سکیورٹی کے حوالے سے اجلاس ہے کیس اس وقت تک ملتوی کیا جائے۔
عدالت نے بار کونسل کے ممبران سے استفسار کیا کہ کیا آپ سیکورٹی سے مطمئن ہیں جس پر ممبر نے جواب دیا کہ اس طرح کی سکیورٹی فراہم نہیں کی گئی ہے۔
پشاور نے سکیورٹی کے حوالے سے اجلاس کی رپورٹ طلب کرتے ہوئے سماعت 11مارچ تک ملتوی کردی۔
