ویب ڈیسک: خیبرپختونخوا میں کھیلوں کا ایک اور تاریخ ساز میلہ سج گیا، وزیر اعلیٰ خیبر پختونخوا علی امین خان گنڈاپور نے خیبرپختونخوا گیمز 2025 کا آغاز کر دیا، گیمز کا آغاز قیوم سٹیڈیم پشاور سے رنگا رنگ تقریب میں ہوا۔ تقریب میں صوبائی کابینہ اراکین، پارلیمنٹیرینز، سرکاری حکام، کھلاڑیوں اور طلبہ نے کثیر تعداد میں شرکت کی۔
کھلاڑیوں کی تعداد اور مقابلوں کے لحاظ سے یہ صوبے کی تاریخ کا سب سے بڑا یونٹ ہے۔ ان مقابلوں میں مجموعی طور پر 2380 کھلاڑی ایک دوسرے کے مد مقابل ہونگے، جن میں 1043 خواتین کھلاڑی بھی شامل ہیں۔ صوبے کی 7 ریجنز سے کھلاڑی ان مقابلوں میں حصہ لے رہے ہیں۔
خیبرپختونخوا گیمز میں مرد کھلاڑیوں کیلئے 16 اور خواتین کیلئے 12 گیمز رکھے گئے ہیں، جبکہ یہ مقابلے پشاور سپورٹس کمپلیکس، عبد الولی خان سپورٹس کمپلیکس چارسدہ، اور پشاور بورڈ سپورٹس گراونڈ پر ہونگے۔ حیات آباد سپورٹس کمپلیکس ، پاکستان سپورٹس بورڈ کوچنگ سنٹر، پی ایس بی ہال، پشاور یونیورسٹی اور کوہاٹ سپورٹس کمپلیکس بھی ان مقابلوں کی میزبانی کرینگے۔
علی امین خان گنڈاپور نے خیبرپختونخوا گیمز 2025 کا آغاز کر دیا ہے، ان گیمز میں اتھلیٹکس، فٹبال، ہاکی ، والی بال، باسکٹ بال، کراٹے ، تائیکوانڈو، باکسنگ، اسکواش، ٹیبل ٹینس، بیڈ منٹن، جمناسٹک، تھروبال، جوڈو، ووشو اور ہینڈ بال شامل ہیں۔
