ویب ڈیسک: وزیراعظم شہباز شریف نے کہا ہے کہ ریٹیلرز کو ٹیکس نیٹ میں لانے کیلئے اقدامات کر رہے ہیں، جبکہ ایسے ریٹیلرز جو ٹیکس نیٹ میں موجود ہیں، ان پر ٹیکس کا مزید بوجھ نہیں ڈالا جائے گا۔
پاکستان ریٹیل بزنس کونسل کے چیئرمین زید بشیر کی قیادت میں وفد سے ملاقات کے دوعران وزیرِاعظم محمد شہباز شریف نے ان کے تمام مسائل کے حل کی یقین دہانی کرائی، وزیرِ اعظم نے متعلقہ حکام کو ریٹیلرز کے مسائل کے حل کیلئے کمیٹی تشکیل دینے کی ہدایت کی۔
وزیراعظم کا کہنا تھا کہ ایسے ریٹیلرز جو ٹیکس نیٹ میں موجود ہیں ان پر ٹیکس کا مزید بوجھ نہیں ڈالا جائے گا، جبکہ ٹیکس نہیں دیتے ایسے ریٹیلرز کو ٹیکس نیٹ میں لانے کیلئے اقدامات کر رہے ہیں، اس کے علاوہ استعمال شدہ اشیاء کی آڑ میں ہونے والی سمگلنگ کے سدباب کیلئے بھی اقدامات تیز کر رہے ہیں۔
انہوں نے کہا کہ ایف بی آر کی دیگر اصلاحات کے ساتھ ساتھ حکومت معیشت کو کیش لیس بنانے کیلئے اقدامات کر رہی ہے۔
وفد کے شرکاء نے کہا کہ ملکی معیشت کے استحکام کیلئے آپ اور آپکی ٹیم کو خراج تحسین پیش کرتے ہیں، مہنگائی اور شرح سود میں خاطر خواہ کمی سے مصنوعات کی کھپت اور پیداوار میں اضافہ ہو رہا ہے جو خوش آئند ہے، امید ہے ان اقدامات سے شرح مہنگائی میں مزید کمی آئے گی۔
