ویب ڈیسک: پاکستان پیپلزپارٹی نے پشاور کے ارباب نیاز کرکٹ سٹیڈیم کے نام کی تبدیلی کے خلاف عدالت جانے کا اعلان کیا ہے ۔
خیبرپختونخوا اسمبلی میں پیپلزپارٹی کے رکن ارباب زرک اور پیپلز ٹریڈ فورم نے صوبائی حکومت کے فیصلے کی مذمت کرتے ہوئے اسے بدنیتی پر مبنی قرار دے دیا ہے ۔
رکن صوبائی اسمبلی ارباب زرک نے اس حوالے سے کہا ہے خیبرپختونخوا حکومت 11سالہ اقتدار میں عوام کو ایک بھی نیا بڑا منصوبہ دینے میں ناکام رہی ہے، اس غیر قانونی اور بدنیتی پر مبنی فیصلے کو عدالت میں چیلنج کریں گے۔
دوسری جانب پیپلز ٹریڈ فورم کے صوبائی سینیئر نائب صدر شبیر الحسنین نے کہا کہ ارباب نیاز کرکٹ اسٹیڈیم کا نام تبدیل کرنے کے فیصلے کو مسترد کرتے ہیں اس کے خلاف عدالت سے رجوع کریں گے،۔
انہوں نے کہا کہ صوبائی حکومت کی جانب سے 16 ہزار ملازمین کو فارغ کرنے کے فیصلے کو بھی مسترد کرتے ہیں ہم ملازمین کے ساتھ شانہ بشانہ کھڑے ہیں۔
انہوں نے کہا کہ رمضان المبارک سے قبل 16 ہزار خاندانوں کی معاشی قتل نہ کیا جائے، صوبے میں بے روزگاری میں 100 فیصد سے زائد کا اضافہ ہوا ہے۔
