ویب ڈیسک: ہیپاٹائٹس سی کے پھیلاؤ میں پاکستان سرفہرست، ہیپاٹائٹس سی خاتمے کے پروگرام کے تحت گلگت بلتستان کے دو اضلاع میں قابل ستائش اقدام کا آغاز کردیا گیا۔
تفصیلات کے مطابق ترجمان وزارت صحت ڈاکٹر مختار احمد برتھ نے کہا ہے کہ ہیپاٹائٹس سی کا پھیلاؤ روکنے کیلئے وزیر اعظم شہباز شریف کی جانب سے گلگت بلتستان کے دو اضلاع ایم سی چلاس دیامر اور یو سی مرکنجہ شگر میں پائلٹ پروجیکٹ شروع کیا گیا ہے۔ اس حوالے سے ترجمان نے مزید بتایا کہ آغا خان ڈویلپمنٹ نیٹ ورک کے تعاون سے شروع کئے گئے پائلٹ مرحلے کے تحت ابادی کی سکریننگ اور علاج کی سہولیات تک رسائی لوگوں کو مفت فراہم کی جا رہی ہے، اس پروگرام سے سیکھنے کے بعد مرکزی پروگرام رواں سال اسلام آباد، گلگت بلتستان اور آزاد جموں و کشمیر کے تمام اضلاع اور دیگر تمام صوبوں میں بھی شروع کیا جائے گا۔
انہوں نے کہا کہ ہیپاٹائٹس سی پاکستان میں صحت عامہ کی ایک بڑی بیماری ہے، پاکستان اب دنیا میں ہیپاٹائٹس کے سب سے زیادہ پھیلاؤ کے ساتھ پہلے نمبر پر ہے جو باعث تشویش ہے۔ چاروں صوبوں کے اشتراک سے 68 ارب کے ہیپاٹائٹس سی خاتمے کا پروگرام شروع کیا ہے۔ وزارت صحت نے ہیپاٹائیٹس کے خاتمے کو یقینی بنانے کیلے ایک مربوط حکمت عملی تشکیل دی ہے. ترجمان کا کہنا ہے کہ اس بیماری کا علاج صرف 3 ماہ میںممکن ہے،لیکن سکریننگ میں متاثرہ مریض کا بروقت پتہ چلانا بڑا چیلنج ہے۔ بروقت علاج ہونے سے جگر کی خرابی اور جگر کے کینسر سے بچا جاسکتا ہے.
