ویب ڈیسک: وزیر اعلیٰ خیبر پختونخوا سردار علی امین گنڈاپور نے ضلع نوشہرہ کے دورے کے موقع پر جڑوبہ کے مستحق گھرانوں کو سولرسسٹم فراہمی کیلئے خصوصی پیکج کا اعلان کر دیا۔ اس موقع پر انہوں نے ضلع نوشہرہ میں نو تعمیر شدہ جڑوبہ ڈیم کا افتتاح بھی کیا۔
اس موقع پر صوبائی وزراء عاقب اللہ خان، میاں خلیق الرحمان، نوشہرہ سے منتخب اراکین قومی و صوبائی اسمبلی بھی وزیراعلیٰ خیبرپختونخوا کے ہمراہ موجود تھے۔ اس مووقع پر وزیراعلیٰ کو بریفنگ دیتے ہوئے بتایا گیا کہ جڑوبہ ڈیم 777 ملین روپے کی لاگت سے تعمیر کیا گیا یے، جس سے 930 ایکڑ بنجر اراضی زیر کاشت آ سکے گی۔
افتتاح کے موقع پر علی امین گنڈاپور کو بریفنگ میں بتایا گیا 115 فٹ اونچا اور 697 فٹ چوڑا یہ ڈیم آبپاشی کےلئے 4اعشاریہ 65 کیوسک پانی فراہم کرے گا، اس سے ملحقہ دیہات کی آبپاشی کےلئے بھی 6اعشاریہ 15 کلومیٹر طویل نہر تیار کی گئی ہے، جبکہ آبپاشی کے علاؤہ یہ ڈیم پانی ذخیرہ کرنے اور گھریلو استعمال کےلئے پانی کی فراہمی کو بھی بہتر بنائے گا۔ اس کے ساتھ ساتھ یہ ڈیم 0اعشاریہ 75 کیوسک پینے کا پانی فراہم کرے گا جو 22 ہزار افراد کی آبادی کےلئے کافی ہوگا۔
وزیر اعلیٰ خیبر پختون خوا علی امین گنڈاپور نے ڈیم کی افتتاح تقریب سے خطاب کرتے ہوئے کہا کہ ڈیم کی تعمیر کا منصوبہ مکمل کر دیا، لوگ اس سے زیادہ سے زیادہ فائدہ اٹھائیں، بڑے افسوس کی بات ہے کہ اس دور میں بھی یہ علاقہ پسماندہ ہے۔ انہوں نے اس موقع پر جڑوبہ میں پینے کے پانی کا مسئلہ حل کرنے کے لیے 2 کروڑ روپے کا اعلان کر دیا، اس کے ساتھ ہی جڑوبہ میں باقی ماندہ دو کلومیٹر سڑک اور اگلے سال بجٹ میں اس علاقے میں آر ایچ سی کی تعمیر کا منصوبہ بھی شامل کرنے کا اعلان کر دیا۔
اپنے خطاب میں وزیراعلیٰ خیبرپختونخوا نے پسماندہ علاقے جڑوبہ کے 250 مستحق گھرانوں کو سولر سسٹم کی فراہمی کے لئے خصوصی پیکج کا اعلان بھی کیا۔ ان کا کہنا تھا کہ نوجوان تعلیم حاصل کریں، اقدار و اخلاقیات کا معیار بلند کریں، یہی ترقی کا زینہ ہیں، موجودہ صوبائی حکومت نوجوانوں کو تمام شعبوں میں آگے بڑھنے کے مواقع فراہم کر رہی ہے۔ یاد رہے کہ وزیر اعلیٰ خیبر پختونخوا سردار علی امین گنڈاپور نے جڑوبہ ڈیم کے افتتاح کے موقع پر جڑوبہ کے مستحق گھرانوں کو سولرسسٹم فراہمی کیلئے خصوصی پیکج کا اعلان کر دیا۔
