ویب ڈیسک: وزیراعلیٰ خیبر پختونخوا علی امین گنڈاپور نے سابق صوبائی وزیر تیمور جھگڑا اور کامران بنگش کو کابینہ میں نہ لینے کا فیصلہ کرلیا ہے ۔
ذرائع کے مطابق وزیراعلیٰ خیبر پختونخوا علی امین گنڈا پور کی جانب سے کامران بنگش اور تیمور جھگڑا کو کابینہ میں شامل نہ کرنے کے فیصلے پر بانی پی ٹی آئی عمران خان کو رضامند کرلیا گیا ہے ۔
اس حوالے سے نجی ٹی وی سے گفتگو کرتے ہوئے سابق وزیر خزانہ تیمور سلیم جھگڑا کا کہنا تھا کہ یہ اندرونی معاملہ ہے، اس پرکوئی تبصرہ نہیں کرسکتا، میں کچھ کہوں گا تو بانی پی ٹی آئی عمران خان کے مقصد کو نقصان پہنچے گا ۔
تیمور جھگڑا نے مزید بتایا کہ بانی پی ٹی آئی نے مجھے پہلی پی ٹی آئی حکومت میں 2 بڑی وزارتیں دی تھیں اور اب بھی انہوں نے مجھے بلایا تھا لیکن ملاقات کی اجازت نہیں دی گئی، میں ساتھیوں کی پیٹھ میں چھرا گھونپنے پر یقین نہیں رکھتا۔
دوسری جانب مشیر اطلاعات خیبرپختونخوا بیرسٹر محمد علی سیف کا اس حوالے سے بتانا تھا کہ یہ پارٹی کا اندرونی معاملہ ہے اور اندرونی معاملے پر میڈیا پر کوئی بات کہنا ضروری نہیں۔
ذرائع کے مطابق بانی پی ٹی آئی عمران خان نے کچھ عرصے قبل علی امین کوکامران بنگش اور تیمور جھگڑا کو کابینہ میں شامل کرانے کا کہا تھا۔
