ویب ڈیسک: مغربی کنارے میں جاری اسرائیلی جارحیت میں شدت آ گئی ، تقریباً20سال بعد اسرائیلی فوجی ٹینک جنین شہر میںداخل ہو گئے ۔
فلسطینی میڈیا کی جانب سے جاری کی گئی ویڈیوز میںدیکھا جاسکتا ہے کہ 3اسرائیلی ٹینک مقبوضہ مغربی کنارے کے شہر جنین میں داخل ہورہے ہیں جوکہ شمالی مغربی کنارے میں فوجی کارروائیوں میں توسیع کی تیاریوں کا حصہ ہے۔
2002 کے بعد پہلا موقع ہے جب اسرائیلی فوج نے مغربی کنارے میں ٹینک تعینات کیے ہیں اس سے قبل یہ تعیناتی آپریشن ڈیفینسو شیلڈ کے دوران کی گئی تھی۔
دوسری جانب اسرائیلی وزیر دفاع اسرائیل کاٹز نے ہدایت دی ہے کہ اسرائیلی فوج کم از کم اگلے ایک سال تک مغربی کنارے کے فلسطینی پناہ گزین کیمپوں میں موجود رہے گی۔
غیر ملکی خبررساں ایجنسی کے مطابق اسرائیلی فوج گزشتہ ماہ سے مغربی کنارے میں فوجی کارروائیاں کر رہی ہے، جس میں کم از کم 60 فلسطینی جاں بحق اور 40ہزار فلسطینی بے گھر ہوچکے ہیں، اسرائیلی وزیر دفاع نے کہا ہے کہ بے گھر فلسطینیوں کو واپس نہیں آنے دیا جائے گا۔
