ویب ڈیسک: آئی ایم ایف نے پاکستان کو جنگلات اور آبی گزرگاہوں کے قریب نئی تعمیرات روکنے کی تجویز دے دی ۔
ذرائع کے مطابق پاکستان اور آئی ایم ایف کے درمیان کلائمیٹ فنانسنگ کیلئے مذاکرات کے دوسرے روزکے دوران آئی ایم ایف تکنیکی وفد اور صوبائی حکومتی حکام کے درمیان بات چیت ہوئی۔
ذرائع نے بتایا کہ پنجاب اوربلوچستان کے حکام نے تکنیکی وفد سے بات چیت کے دوران آئی ایم ایف نے جنگلات، آبی گزرگاہوں کے قریب تعمیرات روکنے کی تجویز دی ہے۔
آئی ایم ایف تکنیکی وفد نے تجویز دی کہ نئی تعمیرات میں روشنی اور ہوا کے بہترین استعمال کو یقینی بنایا جائے، وفد نے قدرتی آفات سے بروقت نمٹنے کیلئے استعداد کار کو بہتر بنانے کی ہدایت کی۔
عالمی مالیاتی ادارے ے نے صوبوں سے موسمیاتی تبدیلیوں کیلئے ترقیاتی منصوبوں کو جیو ٹیگ کرنے کا مطالبہ کرتے ہوئے کہا کہ مختلف منصوبوں میں موسمیاتی تبدیلیوں کیلئے رکھی گئی رقم اور استعمال کو جیو ٹیگ کریں۔
ذرائع کا کہنا ہے کہ آئی ایم ایف نے ہدایت کی کہ ترقیاتی پروگرام میں موسمیاتی تبدیلیوں کیلئے حکمت عملی کو وضع کیا جائے۔
ذرائع کے مطابق پاکستان موسمیاتی تبدیلیوں کے اثرات سے نمٹنے کیلئے ایک ارب ڈالر امداد کا خواہاں ہے، تکنیکی وفد کلائمیٹ فنانسنگ بارے جائزہ کیلئے حکام سے بات چیت کر رہا ہے۔
پاکستان میں موجود آئی ایم ایف حکام نے کل سندھ اور خیبر پختونخوا کے حکام سے مذاکرات کیے تھے ۔
