ویب ڈیسک: خیبر پختونخواحکومت کی بڑی کامیابی، شمالی وزیرستان میں تیل وگیس دریافت کا معاہدہ طے، دستخط کر دیئے گئے، معاہدے پر دستخط کی تقریب پختونخوا ہاوس اسلام میں منعقد ہوئی۔
تفصیلات کے مطابق آئل اینڈ گیس کے شعبے میں خیبر پختونخوا حکومت کی بڑی کامیابی، شمالی وزیرستان میں تیل و گیس دریافت کا معاہدہ سائن کر لیا گیا، اس سلسلے میں تقریب پختونخوا ہاوس اسلام میں منعقد ہوئی جس کے مہمان خصوصی وزیر اعلی خیبر پختونخوا علی امین گنڈاپور تھے۔
وفاقی وزارت پیٹرولیم، محکمہ توانائی خیبر پختونخوا کے علاوہ شراکت دار کمپنیوں کے اعلی حکام بھی اس موقع پر موجود تھے۔ تقریب میں خیبرپختونخوا آئل اینڈ گیس کمپنی لمیٹڈ، آئل اینڈ گیس ڈیویلپمنٹ کمپنی لمیٹڈ، پاکستان پیٹرولیم لمیٹڈ اور گورنمنٹ ہولڈنگ پرائیویٹ لمیٹڈ کے درمیاں معاہدے پر دستخط کئے گئے۔
اس موقع پر وزیراعلیٰ و دیگر حکام کو بریفنگ دیتے ہوئے بتایا گیا کہ معاہدے کے تحت خیبرپختونخوا او جی سی ایل صوبائی حکومت کے واحد ہولڈنگ کمپنی کی حیثیت سے میران بلاک میں سب سے زیادہ یعنی 51 فیصد شیئرز کا مالک ہوگا، باقی 49 فیصد شئیرز کی ملکیت او جی ڈی سی ایل اور دیگر کمپنیوں کے کنسورشیم کے پاس ہوگی۔
بریفنگ کے دوران مزید بتایا گیا کہ معاہدے کے تحت خیبرپختونخوا او جی سی ایل مذکورہ بلاک میں 51 فیصد منافع کا بھی مالک ہوگا، اس منصوبے پر اگلے تین سالوں میں 20 ارب روپے کی سرمایہ کاری کی جائے گی، یہ ساری سرمایہ کاری او جی ڈی سی ایل اور کنسورشیم میں شامل کمپنیاں کریں گی۔
تقریب کے شرکاء کو بتایا گیا کہ سرمایہ کاری میں کسی بھی نقصان یا خسارے کی صورت میں صوبائی حکومت کو کوئی نقصان نہیں اٹھانے پڑے گا، میران بلاک میں تیل و گیس کے وسیع ذخائر ملنے کے امکانات ہیں۔
وزیراعلیٰ خیبرپختونخوا سردار علی امین گنڈاپور نے کہا کہ میران بلاک ایکسپلوریشن کے لئے معاہدے پر دستخط نہ صرف خیبر پختونخوا بلکہ پورے ملک کے لئے اہمیت کا حامل ہے، میران بلاک میں تیل اور گیس کے ذخائر موجود ہیں، جن کی ایکسپلوریشن سے ملک میں توانائی کے بحران پر قابو پانے میں مدد ملے گی۔
انہوں نے کہا کہ کے پی او جی سی ایل اور دیگر قومی کمپنیوں کے درمیان یہ معاہدہ ایک بڑی کامیابی کی شروعات ہے، اس اہم کامیابی پر میں کے پی او جی سی ایل، او جی ڈی سی ایل اور کنسورشیم میں شامل دیگر کمپنیوں کو مبارکباد پیش کرتا ہوں، میران بلاک کی ایکسپلوریشن سے علاقے میں ترقی اور خوشحالی کے نئے دور کا آغاز ہوگا۔
علی امین گنڈاپور نے کہا کہ اس معاہدے سے علاقے کے لوگوں کو روزگار کے بے پناہ مواقع ملیں گے اور عسکریت پسندی کا خاتمہ ہوگا، ملک خصوصا خیبر پختونخوا میں بے پناہ قدرتی وسائل موجود ہیں، لیکن ماضی میں ان وسائل سے بھر پور استفادہ کرنے پر خاص توجہ نہیں دی گئی۔
ان کا کہنا تھا کہ ہمارے پاس سستی پن بجلی کے بے پناہ وسائل ہونے کے باوجود بجلی بنانے کے لئے فرنس آئل اور ایل این جی امپورٹ کیا جاتا ہے، ماضی کے ناقص پالیسیوں کی وجہ سے ملک آج 76 ہزار ارب روپے کا مقروض ہے، ملک کو قرضوں کے اس بوجھ سے نکالنے کے لئے سب کو مل کر ایک لائحہ عمل تیار کرکے اس پر عمل کرنا ہوگا۔
وزیر اعلی خیبرپختونخوا نے کہا کہ ہم اپنے قدرتی وسائل کا دانشمندانہ استعمال کرکے ملک کو خود کفالت کی طرف لے جاسکتے ہیں، ملک میں توانائی کی ضروریات پورا کرنے کے سلسلے میں خیبر پختونخوا کا بہت بڑا کردار ہے۔
علی امین گنڈاپور نے کہا کہ ملک میں تیل کی مجموعی پیداوار کا 42 فیصد حصہ خیبر پختونخوا پیدا کرتا ہے، گیس کی مجموعی پیداوار کا 13 فیصد حصہ اور ایل پی جی کی مجموعی پیداوار کا 40 فیصد حصہ خیبر پختونخوا پیدا کرتا ہے۔ ہم نے صوبے میں تیل اور گیس کے ذخائر دریافت کرنے کے لئے بجٹ میں تین ارب روپے مختص کئے ہیں۔
تقریب سے خطاب کرتے ہوئے وزیر اعلی خیبر پختونخوا سردار علی امین گنڈاپور نے کہا کہ صوبائی حکومت میران بلاک ایکسپلوریشن پر کام کرنے والی کمپنیوں کو ہر ممکن سکیورٹی فراہم کرے گی۔ یاد رہے کہ شمالی وزیرستان میں تیل وگیس دریافت کا معاہدہ طے، دستخط کر دیئے گئے، معاہدے پر دستخط کی تقریب پختونخوا ہاوس اسلام میں منعقد ہوئی۔
