ویب ڈیسک: لینڈ سلائیڈنگ کے باعث شاہراہ قراقرم مختلف مقامات پر بند کر دی گئی ہے، جس سے سیکڑوں مسافر پھنس گئے۔ تفصیلات کے مطابق شدید بارشوں اور لینڈ سلائیڈنگ کے باعث شاہراہ قراقرم بند کر دی گئی ہے، تاہم مختلف مقامات پر شاہراہ بند کرنے کے نتیجے میں گلگت بلتستان اور اسلام آباد آنے اور جانے والے سیکڑوں مسافر پھنس گئے، مقامی لوگوں کو بھی مشکلات کا سامنا کرنا پڑ رہا ہے۔
خیبر پختونخوا اور گلگت بلتستان کے شمالی علاقہ جات میں برفباری اور بارش کا سلسلہ گزشتہ تین دن سے جاری ہے، جس سے علاقے میں نظام زندگی مفلوج ہو کر رہ گیا ہے۔ اس حوالے سے اطلاعات ہیں کہ شاہراہ قراقرم ہائی وے داسو اور دیامر کے درمیان 2 مختلف مقامات پر بند کی گئی ہے، تاہم سڑک کھولنے کے لیے کام جاری ہے۔
ترجمان دیامر پولیس کا کہنا ہے کہ بالائی کوہستان کے علاقے لوتر میں اب بھی سڑک بند ہے، تاہم بھاشا سے رائے کوٹ سیکشن کو کھول دیا گیا ہے جو گزشتہ رات لینڈ سلائیڈنگ کی وجہ سے بند ہو گئی تھی۔
