ویب ڈیسک: ابوظہبی کے ولی عہد شیخ خالدبن محمد سرکاری دورے پر پاکستان پہنچ گئے، اس دورہ کے دوران اہم ملاقاتوں سمیت معاہدوںپر دستخط بھی کئے جائیں گے.
تفصیلات کے مطابق ابوظہبی کے ولی عہد شیخ خالدبن محمد بن زاید النہیان سرکاری دورے پر پاکستان پہنچ گئے ہیں۔نور خان ایئربیس پہنچنے پر صدر مملکت آصف علی زرداری اور وزیراعظم شہباز شریف نے معزز مہمان کا والہانہ استقبال کیا، اس موقع پر بچوں نے ابوظہبی کے ولی عہد کو گلدستے پیش کئے۔
اس موقع پر نائب وزیراعظم اسحاق ڈار سمیت وفاقی وزیر اطلاعات اور دیگر بھی معزز مہمان کے استقبال کیلئے موجود تھے، اسلام آباد میں بارش کے پیش نظر وزیراعظم شہبازشریف معزز مہمان کو بارش سے محفوظ رکھنے کیلئے خود چھتری تھام کر ان کے ہمراہ چلتے رہے۔ ولی عہد کے ہمراہ اعلیٰ سطح کا وفد بھی اسلام آباد پہنچا، جس میںوزراء، اعلیٰ حکام سمیت کاروباری شخصیات بھی شامل ہیں۔
دورے کے دوران ابوظہبی کے ولی عہد پاکستان کی قیادت کے ساتھ باہمی دلچسپی کے امور پر تبادلہ خیال کریں گے، مفاہمت کی یادداشتوں اور دیگر کاروباری معاہدوں پر بھی دستخط کئے جائیں گے۔
