ویب ڈیسک: 20ارب روپے رمضان پیکیج کیلئے مختص ، 40لاکھ خاندان مستفید ہونگے، وزیراعظم شہباز شریف نے رمضان پیکیج 2025 کا افتتاح کر دیا۔
وزیراعظم شہباز شریف نے اس موقع پر خطاب کرتے ہوئے کہا کہ 20ارب روپے رمضان پیکیج کیلئے مختص کئے گئے ہیں، جس سے 40 لاکھ پاکستانی خاندان مستفید ہوں گے،40 لاکھ گھرانوں یعنی تقریباً 2 کروڑ پاکستانیوں کو ڈیجیٹل والٹ کے ذریعے 5 ہزار روپے فی خاندان فراہم کیے جائیں گے، ان کا مزید کہنا تھا کہ شکر ہے رمضان المبارک کے مہینے میں مہنگائی پہلے سے کم ہے، جس کا فائدہ ملک بھر کے عوام کو پہنچے گا۔
شہباز شریف کا کہنا تھا کہ اس سال رمضان پیکج کیلئے 20 ارب روپے مختص کئے گئے ہیں، جبکہ پچھلے سال 7 ارب روپے مختص کئے گئے تھے، اس بار تقریباً اس رقم میں 200 فیصد اضافہ کیا گیا ہے۔ یہ رمضان پیکیج ملک بھر کیلئے بلاتفریق متعارف کروایا گیا ہے، کراچی سے گلگت تک تمام شہروں کے مستحق خاندانوں کو اس پیکیج میں شامل کیا گیا ہے، اس پیکیج کو شفاف بنانے کے لیے سٹیٹ بینک، نادرا، ٹیک اداروں کی کاوشیں لائق تحسین ہیں۔
انہوں نے کہا کہ یوٹیلیٹی سٹورز کو بہتر بنا کر ان کی نجکاری کی جائے گی، اس سال رمضان پیکیج کے لیے لائنیں نہیں لگیں گی بلکہ با عزت طور پر لوگوں کو ڈیجیٹل والٹ سے ریلیف مل جائے گا، اس رمضان پیکیج کی نگرانی بھی کی جائے گی۔
