ویب ڈیسک: آرمی چیف جنرل عاصم منیر نے بہاولپور کنٹونمنٹ کا دورہ کیا ، اس موقع پر انہوںنے بہاولپور کور کی آپریشنل تیاریوں اور تربیتی امور پر بریفنگ لی۔ان کا کہنا تھا کہ جدید جنگی چیلنجز کا مقابلہ کرنے میں متعین خصوصیت کے طور پر تربیتی عمل جاری رہنا چاہیے۔
پاک فوج کے شعبہ تعلقات عامہ آئی ایس پی آر کے مطابق آرمی چیف نے افسران اور جوانوں کے غیر متزلزل عزم، بلند حوصلے اور جنگی تیاریوں کو سراہا۔ اس موقع پر گفتگو کرتے ہوئے انہوں نے کہا کہ سخت تربیت ایک سپاہی کی پیشہ ورانہ ترقی کا سنگ میل ہے، جدید جنگی چیلنجز کا مقابلہ کرنے میں متعین خصوصیت کے طور پر تربیتی عمل جاری رہنا چاہیے۔
علاوہ ازیں آرمی چیف نے سی ایم ایچ انسٹی ٹیوٹ آف میڈیکل سائنسز، انووسٹا چولستان اور مربوط جنگی سیمولیٹر کا بھی افتتاح کیا گیا جبکہ سی ایم ایچ انسٹی ٹیوٹ آف میڈیکل سائنسز میں مختلف یونیورسٹیوں کے طلبہ سے ملاقات بھی کی۔
آئی ایس پی آر کے مطابق جنرل عاصم منیر نے طلبہ کو تعلیمی معیار کے فروغ کیلئے محنت اور لگن کے ساتھ بڑھنے کی ترغیب دیتے ہوئے کہا کہ طلبہ وہ مہارتیں حاصل کریں جو قومی ترقی میں حصہ ڈالنے کے لئے ضروری ہیں۔
پاک فوج کے شعبہ تعلقات عامہ کے مطابق آرمی چیف نے پاکستان کے مستقبل کو تشکیل دینے میں نوجوانوں کے اہم کردار کو سراہا اور نوجوان ٹیلنٹ کے فروغ کیلئے اقدامات کے حوالے سے فوج کی حمایت کا اعادہ کیا۔آئی ایس پی آر کے مطابق قبل ازیں بہاولپور آمد پر کورکمانڈر نے آرمی چیف جنرل عاصم منیر کا پرتپاک استقبال کیا۔
