ویب ڈیسک: چینی کے ذخیرہ اندوزوں کے خلاف کارروائی کا حکم، ارزاں نرخوں پر فروخت کے لیے فئیر پرائس شاپس قائم، چینی سمگلنگ ختم کرنے کے لیے بھرپور اقدامات کی ہدایت۔
تفصیلات کے مطابق وزیراعظم شہباز شریف کی زیر صدارت ملک میں چینی کی سپلائی اور قیمت کے کنٹرول کے حوالے سے اجلاس منعقد ہوا، اجلاس میں انہوں نے حکام کو چینی کے ذخیرہ اندوزوں کے خلاف کارروائی کا حکم دیتے ہوئے چینی کی قیمتوں پر کنٹرول کے حوالے سے سخت اقدامات کی ہدایت کر دی۔
ذرائع کے مطابق اجلاس کو چینی کی پیداوار کے حوالے سے بریفنگ دی گئی جس میں بتایا گیا کہ اس وقت ملک میں چینی کا وافر اسٹاک موجود ہے، صوبائی سطح پر چینی کی ارزاں نرخوں پر فروخت کے لیے فئیر پرائس شاپس قائم کی گئی ہیں، چینی کی سمگلنگ مکمل ختم کرنے کے لیے بھرپور اقدامات لئے جائیں گے اور سمگلرز کے خلاف سخت کاروائی کی جائے گی۔
صوبائی چیف سیکرٹریز نے اجلاس کو بریفنگ دیتے ہوئے بتایا کہ چینی کی غیر قانونی ذخیرہ اندوزی کے خلاف کارروائی یقینی بنائی جائے گی، اس حوالے سے انتظامیہ ضلع کی سطح پر مستعدی سے کام کرے گی۔
وزیراعظم نے کہا کہ عوام کو اشیائے خور و نوش کی ارزاں نرخوں پر فراہمی حکومت کی اولین ترجیح ہے، گزشتہ مہینوں میں حکومت نے چینی کی سمگلنگ پر سخت کارروائی کی، جس سے چینی کی اسمگلنگ کے خاتمے میں مدد ملی۔ وزیراعظم نے چینی کے ذخیرہ اندوزوں کے خلاف کارروائی کا حکم دیتے ہوئے چینی قیمتوں پر کنٹرول کے حوالے سے سخت اقدامات اٹھانے کی ہدایت کر دی، اور چینی کی ذخیرہ اندوزی میں ملوث عناصر کی خلاف سخت کارروائی کرنے کا کہا۔
وزیراعظم نے رمضان المبارک میں چینی اور دیگر اشیائے خورد و نوش کی مناسب قیمتوں پر فراہمی کے حوالے سے حکمت عملی بنانے کی ہدایت کرتے ہوئے کہا کہ وفاقی اور صوبائی حکومتیں مل کر عام آدمی کو سستے داموں اشیائے خور و نوش کی فراہمی یقینی بنائیں۔
شہباز شریف نے کہا کہ رمضان المبارک میں چینی اور دیگر اشیائے ضروریہ کی قیمتوں کے کنٹرول کے حوالے سے کوئی کوتاہی برداشت نہیں کی جائے گی۔اجلاس میں نائب وزیراعظم و وزیر خارجہ اسحاق ڈار ، وفاقی وزیر منصوبہ بندی احسن اقبال ، وفاقی وزیر اقتصادی امور احد خان چیمہ ، وفاقی وزیر صنعت و پیداوار و قومی غذائی تحفظ رانا تنویر حسین ، اور متعلقہ اعلیٰ سرکاری افسران نے شرکت کی۔ چاروں صوبوں کے چیف سیکرٹریز بذریعہ وڈیو لنک اجلاس میں موجود تھے۔
