پشاور: وزیراعلی خیبر پختونخوا علی امین گنڈاپور کا کہنا ہے کہ وفاقی حکومت کی ساری توجہ پی ٹی آئی پر ہے جس کے باعث ملک میں دہشتگردی نے دوبارہ سر اٹھا لیا ۔
میڈیا سے گفتگو کرتے ہوئے وزیراعلیٰ علی امین گنڈا پور نے کہا ہے کہ حکمران دہشتگردی روکنے کیلئے پالیسی نہیں بنا رہے، ان کو کوئی پرواہ ہی نہیں،دہشتگردی صرف کے پی تک محدود نہیں رہے گی پورے ملک میں پھیلے گی۔
علی امین گنڈا پور کا کہنا تھا کرم میں جن لوگوں نے حملہ کیا ان کو نہیں چھوڑا جائے گا، کرم میں امن و امان قائم رکھنے کیلئے کام کر رہے ہیں۔
انہوں نے کہا کہ افغانستان کے ساتھ مذاکرات کیلئے ٹی او آرز بنائے ہیں، افغانستان سے بغیر بات چیت کے یہ مسائل حل نہیں ہوں گے، دہشتگردی صرف کے پی تک محدود نہیں رہے گی، یہ پورے ملک میں پھیلے گی۔
علی امین گنڈا پور کا کہنا تھا ہمارے صوبے کے پیسے نہیں دیے جا رہے، حیران ہوں کہ وفاق تو ہم پر سیاسی مقدمات قائم کر رہا ہے لیکن امن و امان کی صورتحال پر توجہ نہیں دے رہا، پی ٹی ایم پر مقدمات وفاق نے بنائے ہیں ہم اس کیحق میں نہیں۔
وفاقی حکومت کو تنقید کا نشانہ بناتے ہوئے علی امین گنڈا پور کا کہنا تھا یہ دہشتگردی روکنے کیلئے پالیسی نہیں بنا رہے، ان کو کوئی پرواہ ہی نہیں، قرضوں پر قرضے لیے جا رہے ہیں، ان کی کیا کارکردگی ہے؟ حکومت نے ساری توجہ پی ٹی آئی پر دی، دہشتگردی نے دوبارہ سر اٹھا لیا۔
انہوں نے مزید کہا کہ پنجاب حکومت اشتہارات دے رہی ہیں، کارکردگی کچھ نہیں، میں بھی ویڈیوز بنانا شروع کر دوں تو اس سیکیا کارکردگی ظاہر ہو گی۔
علی امین گنڈا پور کا کہنا تھا کہ ارباب نیاز اسٹیڈیم کا نام بانی پی ٹی آئی کے نام سے منسوب کرنا عوام کی خواہش تھی، بانی پی ٹی آئی کو اسٹیڈیم سے متعلق غلط رپورٹ پیش کی گئی، اسٹیڈیم میں پختونخوا کا اپنا سپر لیگ بھی شروع کر رہے ہیں۔
