ویب ڈیسک: سانحہ دارالعلوم حقانیہ کی تحقیقات کیلئے جے آئی ٹی تشکیل دینے کا فیصلہ کر لیا گیا ہے۔ گزشتہ روز وزیراعلیٰ خیبرپختونخوا سردار علی امین گنڈاپور نے جامعہ دارالعلوم حقانیہ اکوڑہ خٹک کا دورہ کیا۔
اس موقع پر وزیراعلیٰ خیبر پختونخوا نے مولانا حامد الحق شہید کے جانشین مولانا عبدالحق ثانی اور بھائی مولانا راشد الحق سے ملاقات کی، اور حامدالحق حقانی کی شہادت پر تعزیت کا اظہار کیا۔
علی امین گنڈا پور نے دھماکے سے متاثرہ مسجد کا دورہ بھی کیا، وزیراعلیٰ کا اس موقع پر کہنا تھا کہ واقعہ انتہائی افسوسناک اور قابل مذمت ہے، سانحہ دارالعلوم حقانیہ کی تحقیقات کیلئے جے آئی ٹی (جوائنٹ انویسٹی گیشن ٹیم) تشکیل دیں گے، اندوہناک واقعہ کی جڑوں تک پہنچنے کی ہر ممکن کوشش کی جائے گی۔
دورہ کے موقع پر وزیراعلیٰ نے مزید کہا کہ واقعہ میں ملوث عناصر قانون کی گرفت سے بچ نہیں سکیں گے، دہشت گردی کے خاتمے کیلئے سب کو متحد ہونا ہوگا۔
