ویب ڈیسک: امریکی یوٹرن کے باوجود کینیڈا کا امریکی مصنوعات پر محصولات برقرار رکھنے کا اعلان ، جسٹن ٹروڈو نے واضح کر دیا کہ جب تک امریکا اپنے محصولات کو مکمل طور پر واپس نہیں لیتا، کینیڈ ا میں امریکی مصنوعات پر محصولات برقرار رہیں گی۔
ذرائع کے مطابق کینیڈا نے امریکا کی جانب سے کئی درآمدات پر ٹیرف ایک ماہ کے لیے مؤخر کرنے کے باوجود امریکی مصنوعات پر محصولات برقرار رکھنے کا اعلان کر دیا ہے۔
ذرائع نے بتایاہے کہ کینیڈا کی جانب سے اب تک یہی فیصلہ کیا گیا ہے کہ امریکی مصنوعات پر ٹیرف برقرار رکھا جائے گا، تاہم کینیڈا کے وزیراعظم جسٹن ٹروڈو نے کہا ہے کہ کینیڈا ٹیکسوں میں اضافہ رکوانے کے لیے امریکی انتظامیہ سے بات چیت جاری رکھے گا۔
جسٹن ٹروڈو کا کہنا تھا کہ بات چیت کا مقصد کینیڈین برآمدات پر تمام امریکی ٹیکس ختم کروانا ہے۔ یاد رہے امریکا نے کینیڈا اور میکسیکو کی مصنوعات پر ٹیرف کا نفاذ ایک مہینے کے لیے مؤخر کردیا ہے۔ امریکی صدر نے ٹیرف کا نفاذ 2 اپریل تک مؤخر کرنے کے ایگزیکٹو آرڈر پر دستخط کردیے ہیں۔
کینیڈا کے وزیراعظم جسٹن ٹروڈو نے کہا ہے کہ کینیڈا میں امریکی مصنوعات پر ٹیرف اس وقت تک برقرار رہیں گے جب تک امریکا اپنے محصولات کو مکمل طور پر واپس نہیں لیتا۔
یاد رہے کہ امریکی صدر نے گزشتہ ماہ میکسیکو اورکینیڈا پر 25 اور چین پر 10 فیصد ٹیرف عائد کرنے کا اعلان کیا تھا، جس کے بعد کینیڈا نے بھی امریکا پر 25 فیصد ٹیرف لگانے کا اعلان کیا تھا۔
