ویب ڈیسک: مشیر اطلاعات خیبرپختونخوا بیرسٹر ڈاکٹر محمد علی سیف نے کہا ہے کہ وفاق نے افغانستان سے بات چیت کیلئے طے شدہ ٹی او آرز سرد خانے میں ڈال دیئے ہیں، حالانکہ ملک میں جاری دہشتگردی کی اس لہر پر قابو پانے کیلئے افغانستان سے بات چیت کرنا ناگزیر ہے۔
ان کا کہنا تھا کہ وفاق خود افغانستان سے بات کر رہا ہے، نہ ہمیں بات کرنے دے رہا ہے، جبکہ وفاق نے افغانستان سے بات چیت کیلئے طے ٹی او آرز سردخانے کی نذر کر دیئے ہیں۔
انہوں نے کہا کہ صوبے میں دہشتگردی کی لہر قابو کرنا ہوگا نہیں تو یہ پھیلتی ہی جائے گی، خیبرپختونخوا کے عوام اور سکیورٹی فورسز قربانیاں دے رہے ہیں، دہشتگردی صرف کے پی کا نہیں پورے ملک کا مسئلہ ہے، ان حالات میں تماشا دیکھنے کے بجائے وفاق دہشتگردی کے خلاف ٹھوس حکمت عملی بنائے۔
صوبائی مشیر اطلاعات کا کہنا تھا کہ دہشتگردی کے عفریت سے نمٹنے کیلئے قومی یکجہتی ضروری ہے۔ اندرون و بیرون ملک ہر سطح پر دہشتگردی روکنے کیلئے عملی اقدامات کئے جائیں۔
ان کا کہنا تھا کہ دہشتگردی کے بڑھتے واقعات پر شدید تشویش کا اظہار کرتے ہوئے خیبرپختونخوا حکومت نے اس حوالے سے ٹھوس اقدامات کا مطالبہ کیا ہے۔
