ویب ڈیسک: بنوں حملے کی مذمتی قرارداد پنجاب اسمبلی میں جمع کرا دی گئی، یہ قرار داد پنجاب اسمبلی کی رکن ایم پی اے سارہ احمد اور مہوش سلطانہ کی جانب سے جمع کروائی گئی۔
قرارداد میں کہا گیا ہے کہ یہ ایوان بنوں میں ہونے والے بزدلانہ اور سنگدلانہ حملے کی شدید مذمت، اور بنوں کے عوام اور سکیورٹی فورسز کے ساتھ مکمل یکجہتی کا اظہار کرتا ہے، جو دہشت گردی کے خلاف بہادری سے برسرپیکار ہیں۔
قرارداد کے مطابق یہ ایوان اپنی بہادر مسلح افواج اور سکیورٹی فورسز کو زبردست خراجِ تحسین پیش کرتا ہے، پاکستان نے ہمیشہ دہشت گردی کے خلاف جرات و استقامت کے ساتھ جنگ لڑی ہے، ایوان ہماری سکیورٹی فورسز کی غیر متزلزل حمایت کا اعادہ کرتا ہے۔
پنجاب اسمبلی میں پیش کی گئی قرارداد میں وفاقی اور صوبائی حکومتوں سے مطالبہ کیا گیا ہے کہ وہ شہریوں کے جان و مال کے تحفظ کو یقینی بنانے کیلئے تمام ضروری اقدامات کریں، اور حملے کے ذمہ داروں کو فوری طور پر قانون کے کٹہرے میں لا کر انہیں سخت ترین سزا دی جائے۔
