ویب ڈیسک: پاکستان تحریک انصاف کے رہنما سینئر شوکت یوسف زئی نے کہا ہے کہ اپوزیشن گرینڈ الائنس پر کافی پیش رفت ہوچکی ہے۔
نجی ٹی وی چینل سے گفتگو کرتے ہوئے شوکت یوسف زئی کا کہنا تھا کہ اپوزیشن گرینڈ الائنس کے سلسلے میں جے یو آئی سربراہ مولانا فضل الرحمان کے تحفظات کو دور کرنے کی کوشش کی جارہی ہے۔
انہوں نے کہا کہ خیبر پختونخوا میں ہمیں دہشت گردی کا سامنا کرنا پڑرہا ہے، وفاقی حکومت کی افغانستان کے حوالے سے کیا پالیسی ہے؟ اس وقت وزیر خارجہ کو کابل میں ہونا چاہیے تھا، وہ اسلام آباد میں بیٹھ کر بیانات دے رہے ہیں۔
سابق صوبائی وزیر نے مزید کہا کہ مولانا فضل الرحمان سے ہمارے سیاسی اختلافات تھے اب ان سے کافی معاملات بہتر ہوچکے ہیں، ہمارا ان سے ملنا جلنا بھی ہے۔
انہوں نے مزید کہا کہ پی ٹی آئی اپنا لائحہ عمل بھی جلد دے گی، ہم نیا الیکشن کروانے کیلئے تیار ہیں۔
