ویب ڈیسک: پشاور ہائِی کورٹ کی جانب سے ڈی جی نیب خیبرپختونخوا کی تعیناتی کیخلاف درخواست پر حکمنامہ جاری کرتے ہوئے ڈائریکٹر انوسٹی گیشن کے تبادلے کا نیب کا اعلامیہ معطل کر دیا۔
تفصیلات کے مطابق ڈی جی نیب خیبرپختونخوا کی تعیناتی کے خلاف دائر درخواست پر پشاور ہائیکورٹ نے گزشتہ سماعت کا مختصر حکم نامہ جاری کردیا۔ پشاور ہائیکورٹ نے نیب خیبرپختونخوا کے ڈائریکٹر انوسٹی گیشن کے تبادلے کو روکتے ہوئے نیب کا 4 فروری کا اعلامیہ معطل کردیا۔ حکم نامے کے مطابق درخواست گزار نیب خیبرپختونخوا میں ڈائریکٹر انویسٹی گیشن تعینات ہے، درخواست گزار نے ڈی جی نیب کی تعیناتی کو ہائیکورٹ میں چیلنج کیا ہے۔ ڈی جی نیب تعیناتی چیلنج کرنے کے بعد درخواست گزار کو خیبرپختونخوا سے نیب راولپنڈی ٹرانسفر کیا گیا۔
مختصر حکم نامے کے مطابق 30 جنوری کو عدالت نے فریقین کو درخواست گزار کے خلاف تادیبی کاروائی سے روکا تھا، عدالتی حکم کے باوجود فریقین نے 4 فروری کو درخواست گزار کو راولپنڈی نیب تبدیل کردیا۔ درخواست گزار کے وکیل کے مطابق عدالتی احکامات کے باوجود درخواست گزار کے خلاف تادیبی کاروائی کی گئی، نیب کے وکلاء نے عدالت کو بتایا کہ درخواست گزار نے راولپنڈی میں اپنے عہدے کا چارج سنبھال لیا ہے۔
فریقین نے عدالتی احکامات کو نظر انداز کرتے ہوئے درخواست گزار کا تبادلہ کیا اور انکوائری بھی شروع کی، ،اس لئے 4 فروری کے تبادلے کا اعلامیہ معطل کیا جاتا ہے، اور درخواست گزار کو نیب خیبرپختونخوا میں کام کی اجازت دی جاتی ہے۔ یاد رہے کہ فریقین درخواست گزار کے خلاف جاری انکوائری کا ختمی فیصلہ اگلی پیشی تک جاری نہ کریں۔
