ویب ڈیسک: پانی کا بحران ملک کو درپیش ، دو بڑے ڈیم تربیلا اور منگلا ڈیم ڈیڈ لیول کے نزدیک پہنچ گئے ہیں، اس حوالے سے ارسا نے صوبوں کو خبردر کر دیا ہے۔
انڈس ریور سسٹم اتھارٹی کی جانب سے موجودہ صورتحال سے صوبوں کو مراسلہ ارسال کر دیا گیا ہے، جس میں پانی تقسیم کا نیا ضابطہ جاری کر دیا گیا ہے۔
ارسا کے خط میں کہا گیا ہے کہ ربیع سیزن کے باقی عرصے کیلئے پانی کی 30 سے 35 فیصد قلت کا خدشہ ہے، صوبائی محکمہ آبپاشی کو فوری اقدامات لینے کی ہدایات جاری کر دی گئی۔
مراسلے میں مزید کہا گیا ہے کہ بارش کے نہ ہونے تک صورتحال بہتر ہونے کا امکان نہیں، رواں ربیع سیزن میں پنجاب نے 20 فیصد جبکہ سندھ نے 16 فیصد پانی کی قلت برداشت کی۔
مراسلے کے مطابق سندھ کو 27ہزار کیوسک طلب کے مقابلے میں 25 ہزار کیوسک پانی فراہم کیا جا رہا ہے، جبکہ اس کے برعکس پنجاب کو40 ہزارکیوسک پانی فراہم کیا جا رہا ہے اور اس کی طلب 45 ہزارکیوسک ہے۔
واپڈا کے مطابق تربیلا ڈیم کا ڈیڈ لیول 1402 فٹ اور منگلا ڈیم کا ڈیڈلیول 1050فٹ ہے، تربیلا ڈیم میں پانی کی موجودہ سطح 1409.50فٹ اور منگلا ڈیم میں پانی کی سطح 1088.45 فٹ ہے۔
