ویب ڈیسک: مارک کارنے کینیڈا کی لبرل پارٹی کے نئے رہنما منتخب، ان کا انتخاب 85 اعشاریہ 9 فیصد ووٹوں سے ہوا۔ اس کے ساتھ ہی جسٹن ٹروڈو کے جانے کا امکان پیدا ہو گیا کیونکہ انہوں نے اپنے مستعفی ہونے کے اعلان کے ساتھ ہی کہا تھا کہ لبرل پارٹی کا نیا سربراہ منتخب ہونے کے بعد وہ عہدہ چھوڑ دیں گے۔
کینیڈا کی حکمران جماعت کے نئے سربراہ مارک کارنے جلد وزیر اعظم جسٹن ٹروڈو کی جگہ لیں گے، غیر ملکی میڈیا رپورٹس کے مطابق مارک کارنے 85اعشاریہ 9 ووٹوں سے کینیڈا کی لبرل پارٹی کے نئے رہنما منتخب ہوئے ہیں۔
اس موقع پر حکمران جماعت کے نئے سربراہ مارک کارنے کا کہنا ہے کہ ٹرمپ کینیڈا کا کنٹرول حاصل کرنے کی کوشش کر رہے ہیں، امریکی ہمارے وسائل، زمین، پانی اور ہمارا ملک چاہتے ہیں، ان کو ان کے عزائم میں کامیاب ہونے نہیں دے سکتے۔
یاد رہے کہ رواں سال جنوری میں کینیڈین وزیر اعظم جسٹن ٹروڈو نے مستعفی ہونے کا اعلان کرتے ہوئے کہا تھا کہ وہ حکمران جماعت لبرل پارٹی کی جانب سے نیا سربراہ چنے جانے کے بعد عہدہ چھوڑدیں گے۔
