ویب ڈیسک: سپریم کورٹ نے سپرٹیکس کیس کی سماعت روزانہ کی بنیاد پر کرنے کا فیصلہ کر لیا، کمپنی وکلاء کی جانب سے سپرٹیکس کیس کی سماعت عید الفطر کے بعد کرنے کی استدعا کی گئی، جسے عدالت نے مسترد کر دیا۔
جسٹس امین الدین خان کی سربراہی میں پانچ رکنی آئینی بینچ نے سپر ٹیکس کے نفاذ سے متعلق کیس کی سماعت کی۔ انہوں نے سماعت کے دوران ریمارکس دیئے کہ جسٹس عامر فاروق اسلام آباد ہائیکورٹ میں معاملے پر فیصلہ دے چکے ہیں، اس لئے آئینی بینچ دوبارہ تشکیل دینا پڑے گا۔
اس موقع پر کمپنی کے وکلاء نے سپر ٹیکس کیس کی سماعت عید الفطر کے بعد کرنے کی استدعا کی، جسے عدالت نے مسترد کر دیا۔ اس موقع پر جسٹس محمد علی مظہر نے کمپنی کے وکلا کو مخاطب کرتے ہوئے کہا کہ عید تک یہ کیس مکمل نہیں ہو گا، جو کیس چلانا چاہتے ہیں، ان کو تو چلانے دیں، کم ازکم کیس چلنا تو شروع ہو۔
سپریم کورٹ نے سپرٹیکس کیس کی سماعت روزانہ کی بنیاد پر کرنے کا حکم دیتے ہوئے کیس کی سماعت کل تک ملتوی کر دی۔
