ویب ڈیسک: پاکستان تحریک انصاف کے رہنما اور سینیٹر شبلی فراز نے کہا ہے کہ آج یہ جو کچھ ہو رہا ہے آئین کی سنگین خلاف ورزی ہے، اور کسی ملک کا آئین کے مطابق نہ چلنا سنگین جرم ہے۔
جوڈیشل کمپلیکس اسلام آباد میں میڈیا سے بات چیت کرتے ہوئے شبلی فراز کا کہنا تھا کہ آج یہ جو کچھ ہو رہا ہے آئین کی سنگین خلاف ورزی ہے، کل میں نے سینیٹ میں آئینی نکات اٹھائے، سینیٹ چیئرمین، ڈپٹی چیئرمین یا صدر کے جو الیکشن ہوئے یہ ایک لحاظ سے غیر آئینی ہیں۔
انہوں نے کہا کہ جن شقوں کا حوالہ دیا گیا ہے یہ واضح ہے کہ ان شقوں کی خلاف ورزی کی گئی ہے، آج یہ جو آئین کی خلاف ورزی کی گئی ہے، اس معاملے کو ہم سپریم کورٹ لے کر جا رہے ہیں۔
سینیٹر شبلی فراز کا مزید کہنا تھا کہ جب کسی طریقہ کار کے بغیر آئین میں تبدیلیاں کر دی جائیں تو آئین محض کاغذ کا ٹکڑا بن کر رہ جاتا ہے۔
