ویب ڈیسک: پشاورہائیکورٹ کے قائم مقام چیف جسٹس کی تعیناتی پھر چیلنج کرتے ہوئے اور ججز سنیارٹی کے حوالے سے ایک اور درخواست دائر کر دی گئی ہے، جس پر کارروائی کرتے ہوئے درخواست دائر کرنے والے وکیل کی استدعا منظور کرلی گئی ہے۔
جسٹس سید ارشد علی اور جسٹس فضل سبحان پر مشتمل پشاور ہائیکورٹ کے 2 رکنی بینچ نے قائم مقام چیف جسٹس اور ججز سنیارٹی بارے میں دائر درخواستوں پر سماعت کی۔
وکیل ملک سلیمان ایڈووکیٹ نے اس موقع پر عدالت کو بتایا کہ ہم نے ججز سنیارٹی متاثر ہونے اور قائم مقام چیف جسٹس کی تعیناتی پھر چیلنج کی ہے۔ ہم نے سنیارٹی لسٹ سے متعلق ضروری دستاویزات جمع کی ہیں، رجسٹرار آفس نے ان پر اعتراض لگایا ہے۔
وکیل نے بتایا کہ ہمیں کاپی ابھی تک نہیں ملی، کاپی مل جائے تو رجسٹرار آفس کے اعتراضات دور کریں گے، جس کے لیے ہمیں کچھ وقت دیا جائے۔ بعد ازاں عدالت نے درخواست گزار وکیل کی استدعا منظور کرلی۔
اس موقع پر عدالت نے درخواست گزار وکیل کو رجسٹرار آفس کے اعتراضات دور کرنے کے لیے مہلت دیتے ہوئے سماعت غیر معینہ مدت تک کے لیے ملتوی کردی۔ اس سے قبل بھی دیگر ہائی کورٹس میں قائم مقام چیف جسٹس کیخلاف درخواستیں دائر کی گئی ہیں.
