ویب ڈیسک: پاکستان تحریک انصاف کے چیئرمین بیرسٹر گوہر علی خان نے قومی اسمبلی میں خطاب کرتے ہوئے کہا کہ سانحہ جعفر ایکسپریس کی شدید مذمت کرتے ہیں، دہشت گردوں کا معصوم شہریوں کو نشانہ بنانا اندوہناک واقعہ ہے۔
انہوں نے کہا کہ ملک دہشت گردی کی لپیٹ میں ہے، ایسے میں ہمیں ایک ہونا چاہیے، امید ہے دہشتگردی کے واقعے کے بعد ساری جماعتیں اکٹھی ہوں گی، سانحہ جعفر ایکسپریس کی شدید مذمت کرتے ہیں، دہشت گردوں نے معصوم شہریوں کو نشانہ بنایا جو کہ اندوہناک واقعہ ہے۔
انہوں نے کہا کہ بولان میں ہمارے سکیورٹی فورسز کے 4 جوان اور 20 مسافر شہید ہوئے جن کے اہلخانہ کے ساتھ دلی ہمدردی ہے، پاک فوج دہشت گردی کے خلاف قربانیاں دے رہی ہے، جبکہ بلوچستان میں سکیورٹی فورسز نے آپریشن کامیابی سے مکمل کیا۔
چیئرمین پی ٹی آئی نے کہا کہ ہم پوائنٹ آف آرڈر مانگیں تو اکثر ملتا نہیں، پوائنٹ آف آرڈر مل جائے تو وقت پورا نہیں دیتے، پارلیمنٹ میں ہماری بات کو میوٹ نہ کیا جائے، آئین میں بھی لکھا ہے کہ 130 دن سیشن ہو، آخری بار 89 دن سیشن چلا۔
بیرسٹر گوہر نے کہا کہ جب کوئی بل آئے اور کوئی قانون بنتا ہے تو اس پر بھی گفتگو ہونی چاہیے، صدر مملکت نے دوسری بار خطاب کیا، رولز کی پاسداری ہونی چاہیے، ایوان کی پاسداری ہونی چاہیے، حالات ایسے ہی رہے تو کسی ایک کیلئے بھی حالات سازگار نہیں ہوں گے۔
بیرسٹر گوہر کا مزید کہنا تھا کہ ماضی کو بھول کر آگے کی طرف بڑھنا ہوگا، جس پر سپیکر قومی اسمبلی ایاز صادق نے کہا کہ میں نے تو ماضی کو بھولنے کی بہت کوشش کی لیکن آپ بھولنے نہیں دیتے۔
