ویب ڈیسک: پاکستان تحریک انصاف کے بانی عمران خان سے پارٹی رہنما جنید اکبر و دیگر کی ملاقات کے حوالے سے دائر درخواست پر فیصلہ محفوظ کر لیا گیا۔
اسلام آباد ہائیکورٹ کے جسٹس خادم حسین نے پی ٹی آئی رہنماؤں کی درخواست پر سماعت کی، پی ٹی آئی رہنما و چیئرمین پبلک اکاؤنٹس کمیٹی جنید اکبر و دیگر عدالت میں پیش ہوئے، درخواست گزاروں کی جانب سے وکیل عائشہ خالد اور نعیم حیدر پنجوتھہ جبکہ سپرنٹنڈنٹ اڈیالہ جیل غفور انجم عدالت میں پیش ہوئے۔
اڈیالہ جیل سپرنٹنڈنٹ نے عدالت کو بتایا کہ جیل میں بانی پی ٹی آئی سے ملاقاتیں ہو رہی ہیں، عمران خان جو فہرست دیتے ہیں، ان رہنماؤں کی ملاقاتیں کروائی جاتی ہیں، سلمان اکرم راجہ، نیاز اللہ نیازی، ابوذر سلمان نیازی ملاقات کر چکے ہیں۔
وکیل درخواست گزار نعیم حیدر پنجوتھہ نے کہا کہ جیل سپرنٹنڈنٹ جو نام گنوا رہے ہیں وہ وکلاء ہیں، سیاسی رہنماؤں کی ملاقات نہیں ہوئی، آپ ریکارڈ منگوا کر پوچھ لیں اور اس درخواست کو التواء میں رکھیں، آج بھی پارٹی رہنماؤں کی ملاقات کی لسٹ جیل حکام کو بھجوائی گئی ہے۔
بعدازاں عدالت نے دلائل سننے کے بعد عمران خان سے پارٹی رہنما جنید اکبر و دیگر کی ملاقات کی درخواست پر فیصلہ محفوظ کر لیا۔
