ویب ڈیسک: پاکستان تحریک انصاف کے سینئر رہنما اور سابق سپیکر قومی اسمبلی اسد قیصر نے خواجہ آصف کے خطاب پر درعمل دیتے ہوئے کہا ہے کہ وزیردفاع کے دماغ پرپی ٹی آئی اور سوشل میڈیا سوار ہے، ان میں اخلاقی جرات ہوتی تو مستعفی ہو جاتے۔
قومی اسمبلی میں اظہار خیال کرتے ہوئے سابق سپیکر قومی اسمبلی اسد قیصر کا کہنا تھا کہ خواجہ آصف کہہ رہے ہیں، سب کچھ پی ٹی آئی کی وجہ سے ہو رہا ہے، ایسا نہیں بلکہ سب کچھ آپ کی نااہلی کی وجہ سے ہورہا ہے، ہمارے لیے سب سے پہلے پاکستان ہے، ہم اداروں کو مضبوط دیکھنا چاہتے ہیں۔
ان کا کہنا تھا کہ 26ویں آئینی ترمیم کی آڑ میں عدلیہ پر حملہ کیا گیا، جب تک عدلیہ آزاد نہیں ہوگی، ملک آگے نہیں بڑھے گا، تمام ادارے اس کام میں لگے ہیں جو ان کا نہیں، ملک میں آئین رہا نہ قانون اور نا ہی اداروں کی عزت ہے، ان کے نمائندے پی ٹی آئی کو توڑنے میں لگے ہیں۔
اسد قیصر کا کہنا تھا کہ آج کاروبار بند ہیں، بیروزگاری، مایوسی اور نوجوانوں میں نااُمیدی بڑھ رہی ہے، دو صوبوں میں امن وامان کی صورتحال کو بہتر بنانا ہوگا، جان بوجھ کر چھوٹے صوبوں کو محروم رکھا جا رہا ہے، حکومت آج روڈ میپ دیتی، بتایا جاتا کہ اس صورتحال سے کیسے نکلا جائے۔
سابق سپیکر قومی اسمبلی کا کہنا تھا کہ آپ کو خارجہ پالیسی کو ری وزٹ کرنا ہوگا، آج آپ کے ایران کے ساتھ تعلقات ٹھیک نہیں، افغانستان کے ساتھ تعلقات پر تحفظات ہمیں بھی ہیں، مذاکرات کی میز پر آ کر ہی مسائل کا حل ممکن ہے، پشاور میں کاروبار کا دارومدارافغان سرحد پر ہے، افغانستان ایک جنگ زدہ ملک ہے، آپ ان کو مستقل دشمن بنا رہے ہیں۔
اسد قیصر نے قومی اسمبلی میں خطاب کرتے ہوئے مزید کہا کہ جتنے بھی غیرقانونی مقیم افراد یہاں ہیں، ان کے خلاف ایکشن لینا چاہیے، پاکستان کے خلاف کوئی کارروائی ہوتی ہے تو بھرپور مذمت کی جانی چاہئے، دہشتگردی پر بلوچستان اور خیبرپختونخوا کی حکومتوں کو آن بورڈ رکھا جائے، سندھ اور پنجاب میں کچے کے ڈاکو ہیں، ان کے خلاف بھی فیصلہ ہونا چاہیے۔
رہنما تحریک انصاف نے کہا کہ اس پارلیمنٹ میں وہ طاقت نہیں کہ عوام کی نمائندگی کرے، ہم نے مطالبہ کیا تھا کہ صاف و شفاف الیکشن ہوں، حقیقی نمائندے ہی پارلیمنٹ کو چلا سکتے ہیں، ہم قیدی نمبر 804 کی بات ہروقت اور ہر موقع پر کریں گے، یونکہ بانی پی ٹی آئی کو ناحق قید کیا ہوا ہے، جبکہ ادھر وزیردفاع کے دماغ پرپی ٹی آئی اور سوشل میڈیا سوار ہے، ان میں اخلاقی جرات ہوتی تو مستعفی ہو جاتے۔
اسد قیصرکا کہنا تھا کہ آئیں الیکشن لڑیں پی ٹی آئی عام ورکرز سے آپ کا مقابلہ کرائے گی، آپ کہہ رہے ہیں مہنگائی کم ہے آئیں بازاروں میں چلیں، لاہور بھی جاکر دیکھا ہے، لاہور ہماری حکومت میں بہتر بن گیا تھا، پچھلے دنوں کراچی گیا اور حیدر آباد کا دورہ کیا، کراچی کو دیکھ کر مجھے بہت دُکھ ہوا، حیدر آباد میں بھی دودھ کی نہریں بہتی نہیں دیکھیں۔
