ویب ڈیسک: آئی جی خیبرپختونخوا ذوالفقار حمید نے کہا ہےکہ دارالعلوم حقانیہ اور بنوں دھماکوں کی تحقیقات جاری ہیں، دونوں واقعات میں خودکش حملہ آور شناخت کر لئے گئے۔
پشاور میں گفتگو کرتے ہوئے انہوں نے کہا کہ نوشہرہ میں دارالعلوم حقانیہ اور بنوں دھماکوں کی تحقیقات جاری ہیں، دھماکوں کی سی سی ٹی وی ویڈیوز حاصل کرلی ہیں، جبکہ خودکش حملہ آوروں کی شناخت بھی کرلی گئی ہے۔
انسپیکٹر جنرل خیبرپختونخوا نے بتایا کہ بنوں واقعے میں استعمال ہونے والی گاڑیوں کی ٹریکنگ بھی کرلی گئی ہے، واقعہ میں غیر ملکی اسلحہ بھی استعمال کیا گیا ہے، جس کی ٹریکنگ کررہے ہیں کہ کس ملک سے اورکیسے آیا؟
ان کا کہنا تھا کہ کرم میں حالات خراب کرنے والے 100 سے زیادہ ملزمان پابند سلاسل ہیں، کرم واقعات میں اب دہشتگردی کا عنصر بھی شروع ہوا ہے، اس کیلئے الگ حکمت عملی بنالی ہے، امید ہے اب کوئی واقعہ نہیں ہوگا۔
آئی جی خیبرپختونخوا کا کہنا تھا کہ کچھ عرصے میں کرم میں پائیدار امن قائم کرنے میں کامیاب ہو جائیں گے، سیف سٹی پراجیکٹ کی منظوری دے دی گئی ہے، چند ماہ میں سیف سٹی پراجیکٹ مکمل لیا جائے گا۔
