ویب ڈیسک: 9مئی مقدمات کی جے آئی ٹی کے سربراہ ڈی آئی جی عمران کشور مستعفی ہو گئے۔
تفصیلات کے مطابق 9مئی مقدمات کی جے آئی ٹی کے سربراہ پنجاب پولیس کے ڈی آئی جی عمران کشور نے استعفیٰ دے دیا، انہوں نے اپنا استعفیٰ آئی جی پنجاب عثمان انور کو بھجوا دیا ہے۔
پنجاب پولیس کے ڈی آئی جی عمران کشور نے پولیس سروس سے استعفیٰ دیا ہے، وہ 9 مئی کے مقدمات میں جے آئی ٹی کے سربراہ تھے۔ اپنے استعفیٰ میں عمران کشور نے کہا ہے کہ وہ پولیس سروس آف پاکستان سے استعفیٰ دے رہے ہیں، انہوں نے اپنے حلف کی پاسداری غیر متزلزل عزم کے ساتھ کی اور کئی بار ذاتی قیمت چکائی۔
انہوں نے مزید لکھا ہے کہ میں ایک ایسے موڑ پر کھڑا ہوں جہاں میری مزید خدمات ممکن نہیں، تاریخ گواہ رہے کہ میں نے عزت کے ساتھ خدمات سرانجام دیں، میں خاموشی سے خدمت نہیں کروں گا، براہ کرم میرا استعفیٰ قبول کریں۔
عمران کشور کئی اضلاع کے ڈی پی او اور لاہور میں آرگنائزڈ کرائم کے سربراہ رہ چکے ہیں، جبکہ 9 مئی مقدمات میں جے آئی ٹی کے سربراہ تھے، جبکہ سی سی پی او آفس میں ڈی آئی جی ایڈمن تعینات تھے۔
پولیس ذرائع کے مطابق پرموشن بورڈ میں ان کے خلاف کمنٹس بھیجے گئے جس پر انہیں ترقی نہیں دی گئی، جس پر دلبرداشتہ ہو کر ڈی آئی جی عمران کشور مستعفی ہوگئے۔
