ویب ڈیسک: سابق کرکٹر احمد شہزاد کا الخدمت تھیلیسیمیا سینٹر پشاور کے دورہ کے دوران بچوں میں تحائف تقسیم کئے گئے۔
تفصیلات کے مطابق سابق کرکٹر اور احمد شہزاد فاونڈیشن کے بانی احمد شہزاد نے اپنے دورہ پشاور کے دوران الخدمت تھیلی سیمیا سینٹر نشترآباد پشاور کا دورہ کیا، اس دوران زیر علاج بچوں میں تحائف اور نقد رقوم تقسیم کی گئیں۔
یاد رہے کہ اس موقع پر الخدمت فاونڈیشن پاکستان کے انچارج برائے امورخارجہ شاہد اقبال اورصوبائی صدر خالد وقاص بھی ان کے ہمراہ موجود تھے۔
دورہ کے موقع پر الخدمت ہسپتال اور الخدمت تھیلی سیمیا سینٹر میں دی جانی والی سہولیات کے حوالے سے انہیں بریفنگ دیتے ہوئے بتایا گیا کہ ہمارے ساتھ تھیلی سیمیا میں مبتلا 600بچے رجسٹرڈ ہیں، جنہیں بلڈ ٹرانسفیوژن کی سہولیات بلامعاوضہ فراہم کی جاتی ہیں۔
احمد شہزاد نے کہا کہ تھیلیسیمیا جیسی موذی بیماری میں مبتلا بچوں کو معیاری طبی سہولیات کی فراہمی کے لئے الخدمت فاونڈیشن گرانقدر خدمات سرانجام دے رہی ہے، ہمارے ادارے احمد شہزاد فاونڈیشن کے قیام کا بنیادی مقصد بھی یہی ہے کہ معاشرے کے پسے ہوئے کمزور اور محروم طبقات کو زندگی کی بنیادی سہولیات کی فراہمی یقینی بنائی جا سکے۔
احمد شہزاد نے مزید کہا کہ ہم الخدمت فاونڈیشن کے تجربات سے استفادہ کررہے ہیں اور ضرورت اس امر کی ہے کہ معاشرے کے صاحب ثروت افراد اس نیک مقصد میں الخدمت فاونڈیشن جیسی بے لوث خدمت کرنے والے اداروں کو سپورٹ کریں۔ یاد رہے کہ سابق کرکٹر احمد شہزاد کا الخدمت تھیلیسیمیا سینٹر پشاور کے دورہ کے دوران بچوں میں تحائف تقسیم کئے گئے۔
