ویب ڈیسک: خیبرپختونخوا کے محکمہ ابتدائی و ثانوی تعلیم نے اساتذہ اور طلبہ کا امتحان لینے کا فیصلہ کرلیا ہے۔ ٹیسٹ کی بنیاد پر تعلیمی اصلاحات اور اس میں بہتری لانے کا فیصلہ کیا جائے گا۔
تفصیلات کے مطابق امتحان کے دوران 2200 سکولوں میں طلبہ اور اساتذہ کا رینڈم ٹیسٹ لیا جائے گا، یہ امتحان گریڈ 3، 5 اور 8 کے طلبہ و طالبات کا لیا جائے گا، جبکہ یہ امتحان انگریزی، اردو، ریاضی اور جنرل سائنس کے مضامین پر مشتمل ہوگا۔
ذرائع کے مطابق امتحان 17 سے 19 مارچ تک جاری رہے گا، اس دوران امتحان کے لیے 50 فیصد طلبہ اور اتنی ہی طالبات کا انتخاب کیا جائے گا، جبکہ 6 ہزار تربیت یافتہ اساتذہ ٹیسٹ کے انعقاد میں حصہ لیں گے، یاد رہے کہ اسی ٹیسٹ کی بنیاد پر تعلیمی اصلاحات اور اس میں بہتری لانے کا فیصلہ کیا جائے گا۔
محکمہ تعلیم ذرائع کی جانب سے بتایا گیا ہےکہ امتحان پر 15 کروڑ روپے خرچ ہونگے، اس حوالے سے مزید بتایا گیا ہے کہ اس امتحان کے نتائج کا موازنہ گزشتہ سال کے امتحان سے کیا جائے گا، اساتذہ اور طلبہ کا امتحان لینے کے بعد نصاب میں تبدیلی یا اساتذہ کی تربیت کا فیصلہ ہوگا۔
