ویب ڈیسک: جنوبی وزیرستان کے دونوں اضلاع میں کرفیو نافذ کر دیا گیا، صبح 6 سے شام 6 بجے تک تمام راستے بند رہیں گے، نوٹیفکیشنز جاری کر دیئے گئے.
تفصیلات کے مطابق جنوبی وزیرستان کے دونوں اضلاع میں کرفیو نافذ کر دیا گیا، جنوبی وزیر ستان اپر، لوئر اور ٹانک کے ڈپٹی کمشنرز کی جانب سے کرفیو کے حوالے سے نوٹیفکیشنز جاری کر دیئے گئے، جس کے مطابق صبح 6 سے شام 6 بجے تک تمام راستے بند رہیں گے، اس کے علاوہ زالئی تا نیو کیڈٹ کالج وانا روڈ ، تنائی، سرواکئی، جنڈولہ، کاوڑ قلعہ سڑک اور احمد وام سے کوٹکئی تک راستے بند رہیں گے۔
اعلامیہ میںمزید بتایا گیا ہے کہ بی بی رغزئی سے جنڈولہ تک سڑک بند رہے گی، ان تمام راستوں پر ہر قسم کی نقل وحرکت پر مکمل پابندی عائد کر دی گئی ہے، جبکہ ان راستوںپر سفر کرنے والے مسافروں کو متبادل راستے اختیار کرنے کی ہدایت کی گئی ہے، جبکہ وانا گومل زام روڈ مسافروں کیلئے کھلا رہے گا۔
کرفیو اور راستے بند ہونے کے حوالے سے ضلعی انتظامیہ کا کہنا ہے کہ ٹانک میں بھی آج کرفیو نافذ ہوگا، جنڈولہ ٹانک وانا جنوبی وزیرستان شاہراہ اس دوران بند رہے گی، اس پر کسی قسم کی آمدورفت نہیں کی جائے گی۔
