ویب ڈیسک: بیرسٹر ڈاکٹر سیف نے کہا ہے کہ دہشتگردی صوبائی نہیں قومی مسئلہ ہے، ان کے خلاف جدوجہد میں تعاون کی ضرورت ہے، اس لئے وفاق سیاسی بیان بازی سے گریز کرے.
تفصیلات کے مطابق مشیر اطلاعات خیبرپختونخوا بیرسٹر ڈاکٹر محمد علی سیف نے کہا ہے کہ دہشت گردی کے خلاف جنگ میں تعاون کی بجائے وفاق سیاسی بیان بازی سے گریز کرے۔ دہشت گردی کے خلاف خاموش تماشائی بنی بیٹھی وفاقی حکومت نے دہشت گردی کے خلاف جنگ میں مدد کے بجائے صوبے کے فنڈز روک رکھے ہیں۔
ان کا کہنا تھا کہ خیبر پختونخوا پولیس دہشت گردوں کا بہادری سے مقابلہ کر رہی ہے، گزشتہ تین دنوں میں پولیس نے دہشت گردوں کے متعدد حملے ناکام بنائے، بنوں اور لکی مروت کے اضلاع میں عوام پولیس کے شانہ بشانہ کھڑی ہو گئے ، اور دہشت گرد حملوں کو پسپا کیا۔ خیبر پختونخوا حکومت بہادر پولیس اور غیور عوام کو خراجِ تحسین پیش کرتی ہے.
صوبائی مشیر نے کہا کہ عوام اور پولیس دہشت گردی کے خلاف جنگ میں متحد ہیں، یہ حقیقت ہے کہ عوام کے تعاون کے بغیر شرپسند عناصر کا خاتمہ ممکن نہیں، آج صوبے میں عوام دہشت گردی کے خلاف پولیس کے شانہ بشانہ کھڑے ہیں. آج ملک کو سنگین صورتحال کا سامنا ہے، دہشت گردی صرف صوبائی ہی نہیں بلکہ قومی مسئلہ ہے.
انہوں نے کہا کہ صوبے کو معاشی طور پر کمزور کرنا درحقیقت دہشت گردی کو فروغ دینے کے مترادف ہے، فاٹا انضمام کے بعد خیبرپختونخوا کی آبادی میں اضافہ ہوا لیکن این ایف سی ایوارڈ میں اس کے مطابق حصہ نہیں دیا جا رہا۔ اے آئی پی پروگرام کے تحت وفاق کے ذمے 700 ارب روپے واجب الادا ہیں، لیکن اب تک صرف 132 ارب روپے جاری کئے گئے ہیں.
صوبائی مشیر اطلاعات نے اپنے بیان مٰیں مزید کہا کہ نیٹ ہائیڈل کے 2 ہزار ارب روپے کے بقایا جات بھی صوبے کو ادا نہیں کئے جا رہے ، جو ان حالات میں صوبے کے ساتھ شدید ناانصافی ہے۔
