ویب ڈیسک: یتیموں کے عالمی دن کے حوالے سے سی ایم ہاوس پشاور میں وزیراعلیٰ خیبرپختوتنخوا کا یتیم بچوں کیلئے افطار ڈنر کا اہتمام، اس دوران انہوں نے یتیم بچوں میں کپڑے و عیدی تقسیم کی اور کہا کہ یتیم بچوں کی کفالت حکومت کی ذمہ داری ہے۔
تفصیلات کے مطابق یتیم بچوں کے عالمی دن کے موقع پر پشاور کے مختلف یتیم خانوں میں رہائش پذیر ایک ہزار سے زائد یتیم بچے و بچیاں وزیراعلی ہاوس آئے، علی امین گنڈاپور کی جانب سے یتیم بچوں کیلئے افطار ڈنر کا اہتمام کیا گیا، وزیراعلی نے یتیم بچوں کے ساتھ افطاری کی۔
اس موقع پر وزیر اعلی کی طرف سے بچوں میں عید کے کپڑے اور نقد عیدی تقسیم کی گئی، وزیر اعلی فردا فردا تمام بچوں کے سے ملے اور ان میں گھل مل گئے، بچوں نے وزیر اعلی کو اپنے درمیان پا کر خوشی کا اظہار کیا۔ صوبائی کابینہ، محکمہ سماجی بہبود کے حکام، فلاحی تنظیموں کے نمائندوں نے بھی تقریب میں شرکت کی۔
وزیراعلیٰ خیبرپختونخوا سردار علی امین گنڈاپور کا کہنا تھا کہ یتیم بچے حکومت اور ریاست کے بچے ہیں، ان یتیم بچوں کی کفالت حکومت کی ذمہ داری ہے، معاشرے کے کمزور طبقوں کی کفالت فلاحی ریاست کی خصوصیات میں سے ہے۔
ان کا کہنا تھا کہ موجودہ صوبائی حکومت عمران خان کے وژن کے مطابق معاشرے کے کمزور اور نادار طبقوں کی کفالت کا سلسلہ جاری رکھے گی، اس موقع پر ملک کی ترقی و خوشحالی، امن و امان، شہداء کی درجات کی بلندی کے لئے اجتماعی دعا کی گئی۔
