ویب ڈیسک: وزیراعلیٰ خیبر پختونخوا علی امین گنڈا پور نے رواں سال صوبے میں ڈینگی کنٹرول کرنے کے لئے بروقت اقدام اٹھاتے ہوئے متعلقہ حکام کو جامع اور قابل عمل ڈینگی ایکشن پلان بنانے کی ہدایت کردی ۔
اس سلسلے میں وزیراعلیٰ سیکرٹریٹ کی جانب سے چیف سیکرٹری کو مراسلہ ارسال کردیاگیا جس میں کہا گیا ہے کہ گزشتہ چند برسوں میں ڈینگی بخار صحت عامہ کو ایک سنگین مسئلہ بن چکا ہے، موثر کنٹرول کے لیے تمام متعلقہ محکموں کی جانب سے پیشگی اور منظم اقدامات ناگزیر ہیں۔
مراسلے میں کہا گیا ہے کہ ڈینگی سیزن سے پہلے منظم اور مربوط اقدامات کے ذریعے ڈینگی کیسز کی تعداد میں نمایاں کمی واقع ہو سکتی ہے اس لئے آنے والے سیزن میں اس مسئلے سے موثر انداز میں نمٹنے کے لئے ابھی سے تمام حفاظتی اقدامات کئے جائیںاور اس مقصد کے لئے فوری طور پر ڈینگی ایکشن پلان 2025تیار کیا جائے۔
مراسلے میں مذکورہ ایکشن پلان میں تمام متعلقہ محکموں کی طرف سے اقدامات اور سرگرمیوں کا شیڈول تیار کرنے کی ہدایت کرتے ہوئے کہا گیا ہے کہ شیڈول میں حفاظتی، ترویجی اور علاج معالجے سے متعلق اقدامات واضح طور پر درج ہوں، پلان میں پورے سال کی انسداد ڈینگی سرگرمیوں کا مہینہ وار فریم ورک مرتب کیا جائے اور ان سرگرمیوں میں سرویلنس، ویکٹر کنٹرول، ماحولیاتی انتظامات، آگاہی مہم ، ضروری سامان کی خریداری اور علاج معالجے سمیت تمام سرگرمیاں شامل ہوں۔
مراسلے میں کہا گیا کہ ان تمام سرگرمیوں کی انجام دہی کے لئے حقیقت پسندانہ ٹائم لائنز کا بھی تعین کیا جائے، ایکشن پلان میں تمام محکموں کے انفرادی اور اجتماعی ذمہ داریوں کا بھی واضح کیا جائے۔
ایکشن پلان کے اہداف کے حصول کے لئے مانیٹرنگ اور رپورٹنگ کا موثر نظام بھی وضع کیا جائے۔
