ویب ڈیسک: پاکستان سمیت دنیا بھر میں جشن نوروز منانے والوں کو شہبازشریف کی مبارکباد، انہوں نے کہا کہ یہ نئے سال کو نئی امیدوں اور امنگوں کے ساتھ خوش آمدید کہنے کا وقت ہے، نوروز موسم بہار کی آمد اور فطرت کی تجدید کی علامت ہے۔
وزیراعظم شہباز شریف نے جشن نوروز کے موقع پر پیغام جاری کرتے ہوئے کہا ہے کہ پاکستان اور دنیا بھر میں جشن نوروز منانے والوں کو مبارکباد پیش کرتے ہیں، یہ ان بے شمار نعمتوں جس سے انسان کو نوازا گیا ہے کی شکرگزاری اور نئے سال کے لیے اپنی امیدوں اور خواہشات کے اظہار کا موقع ہے۔
انہوں نے کہا ہے کہ نئے سال کو نئی امیدوں اور امنگوں کے ساتھ خوش آمدید کہنے کا وقت ہے، اس خوشی کے موقع پر میں پاکستان میں نوروز منانے والے بہن بھائیوں باالخصوص پارسی برادری سے تعلق رکھنے والے پاکستانیوں کا شکرگزار ہوں ،جنہوں نے پاکستان کی تعمیر و ترقی میں اہم کردار ادا کیا۔
وزیراعظم پاکستان نے مزید کہا کہ آئیں! آج سب مل کر اس خوشی کے دن کو باہمی اختلافات کو ختم کرنے، علاقائی و ثقافتی ہم آہنگی اور اتحاد کو فروغ دینے کا دن مل کر بنائیں۔
یاد رہے کہ نوروز فارسی زبان کا لفظ ہے، جس کی لغوی معنی نیا دن ہوتا ہے اور یہی وجہ ہے کہ اس تہوار کو قدیم فارسی کیلنڈر کے آغاز کے موقع پر منایا جاتا ہے، نوروز کا تہوار پاکستان سمیت دنیا بھر میں 20 مارچ کو منایا جاتا ہے . بعض مورخین کے مطابق ’نوروز‘ کا تہوار تین ہزار سال سے منایا جا رہا ہے۔
ایرانی اس آغاز کو ثقافتی دن سمجھ کر مناتے ہیں، اور یہ دن فقط ایران تک محدود نہیں، بلکہ فارسی زبان جہاں جہاں بولی جاتی ہے وہاں اس کے اثرات زیادہ واضح نظر آتے ہیں.
پاکستان سمیت دنیا بھر میں جشن نوروز منانے والوں کو شہبازشریف کی مبارکباد، انہوں نے کہا ہے کہ یہ نئے سال کو نئی امیدوں اور امنگوں کے ساتھ خوش آمدید کہنے کا وقت ہے، نوروز موسم بہار کی آمد اور فطرت کی تجدید کی علامت ہے۔
