ویب ڈیسک: جمعیت علمائے اسلام ف کے سربراہ مولانا فضل الرحمان نے جے یو آئی رہنما اور سینئر سیاستدان حافظ حسین احمد کی وفات پر اظہار افسوس کرتے ہوئے کہا ہے کہ مرحوم حافظ حسین احمد زیرک اور نظریاتی سیاستدان تھے، اور ان کی وفات کے ساتھ ہی حسین یادوں کا ایک باب ختم ہوگیا۔
انہوں نے کہا کہ حافظ حسین احمد مرحوم نے جوانی سے بڑھاپے تک ایک ہی کاز کے لئے ایک ہی پلیٹ فارم سے جدوجہد کی ، ان کی یادیں ہمیشہ ہمارے دلوں میں زندہ رہیں گی، مرحوم حافظ حسین احمد زیرک اور نظریاتی سیاستدان تھے۔
قائد جمیعت کا مزید کہنا تھا کہ اللہ کریم مرحوم کی خدمات کو قبول فرمائے، رمضان کے بابرکت مہینے میں اللہ کریم کے حضور پیش ہونا یقیناً حافظ صاحب کی بلندی درجات کا سبب بنے گا، میں ان کے فرزندان، اہل خانہ ،متعلقین اور جے یو آئی کارکنوں سے اظہار تعزیت کرتا ہوں ، غم کی اس گھڑی میں اہل خانہ کے ساتھ برابر کا شریک ہوں، اللہ کریم اہلخانہ کو صبر جمیل دے۔
یاد رہے کہ سینئر سیاستدان حافظ حسین احمد کچھ عرصہ سے علیل رہنے کے بعد گزشتہ روز انتقال کر گئے۔ خاندانی ذرائع کے مطابق سینئر سیاستدان حافظ حسین احمد گردوں کے مرض میں مبتلا تھے۔ حافظ حسین احمد 1951 میں کوئٹہ میں پیدا ہوئے تھے، اور 2002 تا 2007 اور 1988 تا 1990 تک قومی اسمبلی کے ممبر رہ چکے ہیں۔
