ویب ڈیسک: کراچی میں یوم شہادت حضرت علی علیہ اسلام کے مرکزی جلوس کے حوالے سے ٹریفک پلان جاری کر دیا گیا، کل 21 رمضان المبارک کو مرکزی مجلس نشتر پارک میں ہو گی، مجلس کے اختتام کے بعد جلوس دوپہر ایک بجے برآمد ہو گا۔
پولیس ذرائع کے مطابق کراچی میں یوم شہادت حضرت علی علیہ اسلام پر مرکزی جلوس کا ٹریفک پلان جاری کر دیا گیا، نشتر پارک میں مجلس اختتام پذیر ہونے کے بعد جلوس دوپہر ایک بجے برآمد ہو گا، اس دوران ایم اے جناح روڈ گرومندر سے ٹاور تک عام ٹریفک کے لیے بند کردی جائے گی، جبکہ متبادل راستوں پر رہنمائی کے لیے ٹریفک پولیس کے اہلکار تعینات ہوں گے۔
نشتر پارک سے برآمد ہونے والا جلوس نمائش، ایم اے جناح روڈ، سی بریز سے صدر ایمپریس مارکیٹ پہنچے گا، اور صدر ریگل سے گزرتے ہوئے تبت سینٹر پر ایک بار پھر ایم اے جناح روڈ پر آئے گا ، اور ایم اے جناح روڈ پر بولٹن مارکیٹ سے کھارادر حسینیہ امام بارگاہ پر اختتام پذیر ہوگا۔
ٹریفک پولیس نے بتایا ہے کہ ناظم آباد سے آنے والے افراد لسبیلہ چوک سے نشتر روڈ کی طرف گارڈن سے جبکہ لیاقت آباد سے تین ہٹی سے لسبیلہ چوک اور بائیں جانب مڑ کر سینٹرل جیل کی جانب جا سکتے ہیں۔ اس کے علاوہ حسن سکوائر سے پی پی چورنگی جانے والی ٹریفک کو کشمیر روڈ سے سوسائٹی لائٹ سگنل کی طرف بھیجا جائے گا، ٹریفک کو جیل فلائی اوور سے تین ہٹی سے نشتر روڈ (لسبیلہ چوک) کی طرف موڑ دیا جائے گا۔
