ویب ڈیسک: مشیر اطلاعات خیبرپختونخوا بیرسٹر ڈاکٹر سیف نے پیپلز پارٹی اور نون لیگ کی نمائشی لڑائی پر ردعمل دیتے ہوئے کہا ہے کہ یہ ڈرامہ بند کیا جائے، جبکہ اعجاز چوہدری کے پروڈکشن آرڈر نظرانداز کرکے مریم نواز سینیٹ کی توہین کر رہی ہیں، ان کیخلاف کارروائی کی جائے۔
ترجمان خیبرپختونخوا حکومت نے کہا ہے کہ پی پی اور ن لیگ نمائشی لڑائی سے عوام کو دھوکا نہیں دے سکتے۔ چیئرمین سینیٹ یوسف رضا گیلانی پی ٹی آئی رہنما اعجاز چوہدری کے پروڈکشن آرڈرز پر عملدرآمد نہ کرنے کے جرم میں وزیراعلیٰ مریم نواز کو طلب کر کے ، ان کے خلاف توہین سینیٹ کی کارروائی کریں۔
انہوں نے کہا کہ بے گناہ اعجاز چوہدری کے لیے جاری کردہ پروڈکشن آرڈرز پر وزیراعلیٰ پنجاب 3 ماہ سے عمل درآمد نہیں کر رہیں، جس سے وہ سینیٹ کی توہین بھی کر رہی ہیں۔ چیئرمین سینیٹ کو تھرتھر کانپنے کی بجائے سینیٹ کی توہین پر وزیراعلیٰ پنجاب کو طلب کر کے ان کیخلاف کارروائی کرنا ہوگی۔
بیرسٹر ڈاکٹر سیف کا کہنا تھا کہ 3ماہ سے پروڈکشن آرڈرز پر عمل نہ ہونا پیپلز پارٹی اور مسلم لیگ (ن) کی ملی بھگت ثابت کرتا ہے، چیئرمین سینیٹ کی جانب سے جاری ہونے والے پروڈکشن آرڈرز پر پیپلز پارٹی اب نمائشی بیانات دینے کی بجائے حکومت سے علیحدہ ہونے کا اعلان کرے۔
مشیر اطلاعات نے کہا کہ پیپلز پارٹی اور مسلم لیگ (ن) نمائشی لڑائی سے عوام کو دھوکا نہیں دے سکتے، دونوں جماعتیں عوام اور تاریخ میں 26 ویں ترمیم کرنے والے جمہوریت کش ٹولے کے طور پر یاد رکھی جائیں گی۔
