ویب ڈیسک: خیبرپختونخوا حکومت کی جانب سے صوبے میں عوامی خدمات کی فراہمی ڈیجیٹائز کرنے کا فیصلہ کیا گیا ہے، اس سلسلے میں وزیر اعلی خیبرپختونخوا سردار علی امین گنڈاپور کی خصوصی ہدایات پر عوامی خدمات کی آن لائن فراہمی کے لیے ڈیجیٹل پبلک سروسز کیٹلاگ مرتب کیا گیا ہے۔
ذرائع کے مطابق ڈیجیٹل پبلک سروسز کیٹلاگ میں فی الوقت 26 محکموں کی 106 عوامی خدمات شامل کی گئی ہیں، حکومت کی طرف سے فراہم کردہ باقی تمام خدمات کو بھی اس کیٹلاگ میں شامل کرنے کا فیصلہ کیا گیا ہے، اس حوالے سے تمام صوبائی محکموں کو ڈیٹا فراہم کی ہدایت کی گئی ہے۔
ذرائع کے مطابق اس وقت صرف 29.55 فیصد عوامی خدمات ڈیجیٹائزڈ ہیں، وزیر اعلی کے گڈ گورننس پالیسی کے تحت عوام کی سہولت کے لئے باقی ماندہ تمام خدمات کو بھی بھی ڈیجیٹائز کرنے کی ضرورت یے۔ تمام محکمے ڈیجیٹل کیٹلاگ میں شامل کرنے کے لئے اپنے متعلقہ عوامی خدمات کا ڈیٹا فراہم کریں۔
ڈیجیٹل پبلک سروسز کیٹلاگ تمام صوبائی محکموں کی طرف سے فراہم کی جانے والی عوامی خدمات کا ایک سنٹرلائزڈ بینک کے طور پر کام کرے گا، اس سے شہریوں کو مختلف عوامی خدمات کے حصول میں آسانی ہوگی، شہری مختلف حکومتی خدمات اور سہولیات گھر بیٹھے آن لائن حاصل کرسکیں گے۔
ذرائع کا کہناہے کہ ڈیجیٹائزیشن کے بغیر سرکاری خدمات کی فراہمی کا عمل پیچیدہ رہتا ہے، اس لئے عوامی خدمات کی فراہمی کے موجودہ طریقہ سے تاخیر، عدم فعالیت اور عوام کے لیے مشکلات پیدا ہوتی ہیں، ڈیجیٹل پبلک سروسز کیٹلاگ عوامی سہولت اور فلاح و بہبود کو یقینی بنانے کا ایک براہِ راست ذریعہ ہے۔
ذرائع کا کہنا ہے کہ ڈیجیٹل کیٹلاگ خدمات کی ڈیجیٹائزیشن کے ذریعے کارکردگی، عوامی سہولت کو بہتر بنانے میں مدد دے گا، جبکہ کیٹلاگ کو اگلے مرحلے میں "دستک پلیٹ فارم” کے ساتھ بھی منسلک کیا جائے گا۔ عوام کی سہولت کیلئے خیبرپختونخوا حکومت کی جانب سے صوبے میں عوامی خدمات کی فراہمی ڈیجیٹائز کرنے کا فیصلہ کیا گیا ہے.
