ویب ڈیسک: پاک فوج نے شمالی وزیرستان میں افغان سرحد سے دراندازی کی کوشش ناکام بناتے ہوئے 16دہشت گرد ہلاک کردیئے ۔
پاک فوج کے شعبہ تعلاقات عامہ کی جانب سے جاری بیان کے مطابق 22اور 23مارچ کی درمیانی شب شمالی وزیرستان کے علاقے غلام خان کلی میں پاک افغان سرحد کے ذریعے دراندازی کی کوشش کرنے والے خوارج کے ایک گروہ کی نقل و حرکت کو سکیورٹی فورسز نے بروقت مانیٹر کیا۔
ترجمان پاک فوج نے بتایا کہ پاک فوج کے جوانوں نے فوری اور موثر کارروائی کرتے ہوئے فائرنگ کے تبادلے میں تمام 16دہشت گرد ہلاک کردیئے ۔
آئی ایس پی آر کے مطابق پاکستان مسلسل عبوری افغان حکومت سے مطالبہ کر رہا ہے کہ وہ اپنی جانب سرحدی نگرانی کے موثر انتظامات یقینی بنائے۔
آئی ایس پی آر کا کہنا تھا کہ عبوری افغان حکومت سے توقع کی جاتی ہے کہ وہ اپنی ذمہ داریاں پوری کرے اور پاکستان کے خلاف دہشت گردی کے لیے افغان سرزمین کے استعمال کو روکے۔
ترجمان پاک فوج نے کہا کہ پاکستان کی سکیورٹی فورسز اپنی سرحدوں کے تحفظ اور ملک سے دہشت گردی کے خاتمے کے لیے پرعزم ہیں، ہر قیمت پر اس ناسور کو جڑ سے اکھاڑ پھینکنے کے لیے پر مکمل طور پر تیار ہیں۔
