ویب ڈیسک: غزہ میں 7اکتوبر 2023سے جاری اسرائیلی جارحیت کے نتیجے میں شہید ہونے والے فلسطینیوں کی تعداد 50ہزار سے بڑھ گئی ۔
فلسطینی وزارت صحت کے مطابق غزہ میں گزشتہ 17ماہ سے جاری اسرائیلی بربریت کے نتیجے میں 50ہزار 21بے گناہ فلسطینی شہید جبکہ ایک لاکھ 13ہزار 275 زخمی ہو گئے ہیں ۔
حکام کے مطابق شہدا کی تعداد میں 233ایسے افراد کا اندراج ہوا ہے جو پہلے لاپتا تھے تاہم بعد ازاں حکام کی جانب سے ان کی شہادت کی تصدیق کی گئی۔
خیال رہے کہ اسرائیلی فوج غزہ جنگ بندی معاہدے کو توڑتے ہوئے غزہ میں دوبارہ زمینی اور فضائی حملے شروع کرچکی ہے جن کے نتیجے میں 18مارچ سے اب تک 673فلسطینی شہید جبکہ 1233 زخمی ہوچکے ہیں۔
عرب میڈیا کے مطابق شہدا کی یہ تعداد صرف ایک محتاط تخمینہ ہے یہ وہ لوگ ہیں جنہیں غزہ کی پٹی کے صحت کے مراکز میں رجسٹر کیا گیا ہے۔
شہداء میں بے شمار افراد ایسے بھی ہیں جنہیں رجسٹر کیے بغیر دفنایا جاچکا ہے یا جو ملبے کے نیچے دب کر لاپتا ہو گئے ہیں۔
