ویب ڈیسک: پنجاب کے ضلع ڈیرہ غازی خان میں پولیس چیک پوسٹ پر دہشت گردوں کا بڑا حملہ پسپا کر دیا گیا۔
پنجاب پولیس کے ترجمان کے مطابق تھانہ وہوا کی جھنگی پولیس چیک پوسٹ پر 20سے 25دہشتگردوں نے رات کی تاریکی کا فائدہ اٹھاتے ہوئے راکٹ لانچرز اور جدید ہتھیاروں سے حملہ کیا۔
چوکی پر تعینات پنجاب پولیس کے الرٹ اہلکاروں نے زبردست مزاحمت اور جوابی فائرنگ سے حملہ ناکام بنا دیااور جوابی کارروائی سے دہشتگرد پسپا ہو کر فرار ہو گئے۔
پولیس کی جوابی کارروائی میں دہشت گردوں کو جانی نقصان پہنچنے کی اطلاعات ہیں۔
ترجمان نے بتایا کہ فرار ہونے والے دہشتگردوں کی تلاش کے لئے علاقے میں سرچ آپریشن جاری ہے۔
