ویب ڈیسک: ٹوبہ ٹیک سنگھ میں 22سالہ لڑکی ماریہ کو گلا دبا کر قتل کرنے کے کیس میں عدالت نے مقتولہ کے والد اور بھائی کو سزائے موت سنا دی ۔
ڈسٹرکٹ اینڈ سیشن کورٹ نے فیصلہ سناتے ہوئے لڑکی کے والد اور بھائی کو سزائے موت کاحکم دینے کے ساتھ دونوں ملزمان کو 10،10لاکھ روپے جرمانے کی سزا بھی سنائی۔
عدالت نے ویڈیو بنانے والے مقتولہ کے دوسرے بھائی اور قتل کے وقت موجود مقتولہ کی بھابھی کو بری کردیا۔
مقتولہ کے دوسرے بھائی شہباز نے موبائل فون سے واقعے کی ویڈیو بنائی تھی، مقتولہ کی بھابھی کابیان تھا کہ اس کے کمسن بچوں کو جان سے مارنے کی دھمکی دی گئی تھی۔
خیال رہے کہ ٹوبہ ٹیک سنگھ میں ماریہ کو 17اور 18مارچ 2024کی درمیانی شب گلا دبا کر قتل کردیا گیا تھا، 22 سال کی ماریہ کے قتل کے وقت چاروں ملزمان کمرے میں موجود تھے، ماریہ کے بھائی نے مبینہ طور پرغیرت کے نام پرگھر والوں کے سامنے اس کا گلا دبا دیا تھا۔
قتل کے بعد ماریہ کی خاموشی سے تدفین کردی گئی تھی تاہم واقعے کی ویڈیو سوشل میڈیا پر سامنے آنے کے بعد پولیس نے ملزمان کو گرفتار کیا تھا۔
